Silchar, Naiwieng 07 :U nongmihkhmat ka BJP na Assam u Dipayan Chakraborty ha ka sngi Thohdieng ba la lah ula aiti ia ka memorandum sha u Myntri Rangbah (CM) ka jylla u Dr Himanta Biswa Sarma ha kaba ula kyntu ban shim ia ki sienjam ban pynthikna halor ka jingshngain jong ki briew kiba dei na shabar ka jylla, khamtam ki Bengali /Hindu kiba shong ba sah ha Meghalaya.
Ula ong ruh ba kane kala wan jia hadien ka jingpynlong rally ba dang shen da ki kynhun seng kiba dei ki trai muluk kaba la pynmih ia ka jingiakynad bad wanrah ka jingmynsaw jong kiba bun ki briew kiba dei ki bar jylla.
U Dipayan ula pynpaw ha katei ka memorandum da kaba ong kila don shibun ki jingjia shah thombor jong ki briew kiba dei na shabar ka jylla, kata khamtam ki Hindu hapoh Meghalaya mynta la bun bun snem.Nalor kata ula kam ruh ba ka jingthmu kaba sha lyndet halor kine ki kam thombor ka long ban pynkhuid bad thombor naphang ia kine ki briew kiba dei na shabar ka jylla.
“Haduh kumba lai hajar tylli ki jingjia kam thombor la sakhi na kane ka jylla ba marjan naduh kine ki khyndiat phew snem ba la dep, hynrei watla katta ym shym la don ki ban ngat ha ki jingshah pynshitom halor ki kam pyntriem kiba kila leh pyrshah ia ki nongshong shnong kiba dei ki Hindu,” ong u Dipayan ha ka memorandum.
Shuh shuh ula kyntu ruh ia ka jingtuklar lem jong u CM Sarma ha kaba iadei bad kane ka phang da kaba kyrpad ia u ba un pynthikna halor ka jingshngain jong ki paid Hindu ha kane ka jylla ba marjan, ong ka jingthoh.
