Nongpoh, Nohprah 08: Ka Hynniewtrep National Youth Front (HNYF) hynne ka sngi palei kala pynskhem ia ki nongkitkam ba thymmai jong ka Nongpoh Circle, kiban khmih ia ka khia ka shon jong ki paidbah ka thain.
Ia kine ki nongkitkam la pynskhem da u President ba rangbah ka seng Bah Sadon Blah ha ka jingiadonlang u President ka HNYF Ri-Bhoi Bah Marcus Marten lem bad kiwei kiwei ki nongialam na ka Sengkmie.
Ki nongialam ba thymmai ka HNYF Nongpoh Circle, ki kynthup ia u Bah Robert Thabah kum u President, u Bah Syrpailang Makdoh kum u Vice-President, u Bah Fullbok Lyngdoh, General Secretary, u Bah Birbor Khongbeh kum u Asst General Secretary lem bad shibun ngut kiwei pat.
Haba kren ha kane ka sngi, u Bah Sadon K Blah, u la pynpaw ïa ka jingkmen kaba khraw ban ïohi ïa ka mynsiem shakri paidbah kaba shitrhem jong ki samla kiba la pynïasoh sha ka seng ban ai ïa ka jingshakri sha u paidbah ka dong ka thaiñ bad ruh ban peitngor ïa ki jingsniew kiba don hapdeng ka sor Nongpoh.
Ula ai mynsiem ba kum ki nongkitkam ka seng ki dei ban long kiba ïatylli bad kiba sngewthuh jingmut haba ki don kino kino ki mat kiba ki hap ban mih shakhmat bad ruh ban kiar pat na kino kino ki kam kiba lah ban pynthoh bria ïa ka kyrteng jong ka seng.
