Pynskhem u Bah Paul Lyngdoh ia ka VDP ha Nongsohphoh ban iakhun droks

Shillong, Lber 14: U MLA ka United Democratic Party (UDP) bad nongai jingmut ka tnat Social Welfare Bah Paul Lyngdoh haka 13 tarik Lber u la pynskhem ïa ka Village Defence Party (VDP) jong ka Dorbar Shnong Nongsohphoh Upper Mawprem bad kyntu ruh ïa kiwei ki Dorbar Shnong kiba don ha West Shillong constituency ban thaw ïa ki VDP da kaba kdew ïa ka rukom treikam ki Neighbourhood Watch ha New York ban tehlakam iaki kam sniew.

“Kane ka dei ka por ha kaba ngi iashim bynta ban pyni ba kam pat biang tang ban don u nongialam namar u nongialam ruh u donkam ia ka kynhun bad phi dei kata ka kynhun” ong u bah Lyngdoh.

Haba ban jur ïa ki lai snem jong u kum u MLA jong ka West Shillong, u Bah Paul u ai burom ïa ka jingkut jingmut jong ki nongshong shnong ban iakhun pyrshah ïa u drok bad ki jingdih buaid.

“Haba don ka jingkut jingmut kaba skhem na ka liang jong phi, ngin ym don jingeh ban weng bad pynduh jait ïaki kam na ka imlang sahlang” ula ong.
U Bah Paul ula kdew baka neighbourhood‑watch jong ka New York kum nuksa ia ka VDP ban iada iaki Shnong ha Mawprem.

“Haba phi don ki VDP, phi pynthikna ïa ka jingshngaiñ bad jingbit jingbiang jong ki ïing ki sem jong phi, jong ki khun ki kti jong phi kam dei tang ka kamram jong ki pulit, ka dei ka kamram jong uwei pa uwei u nongshong shnong,” u la ong.

U Bah Lyngdoh u la pynkynmaw ia ki nongshong shnong ba ka VDP Mawprem kham mynshwa ka la iarap ban weng ia ka jingjur ka jingdie kyiad beain.

“Ka VDP ha Mawprem kam dei kaba thymmai, ka VDP ka la wan shakhmat bad pynbeit ia ka jingeh kaba mih na ka jingdie kyiad beain” ula bynrap.
U la kyntu ia kiwei pat ki Dorbar Shnong jong ka West Shillong ban thaw ia ki VDP, da kaba kular ia ka jingkyrshan na ka tnad Social Welfare bad ka DREAM Project.