Shillong, Lber 08: Ka kynhun Surya Kiran Aerobatic Team (SKAT) jong ka Indian Air Force (IAF) kala pynshoh biej ia ki paidbah ha ka Air Show kaba la long hynne dang step ha Pung Umiam.
Katei ka kynhun kala pyni ia la ka jingtbit, ial aka sap ka phong kaba kyrpang bad iaka jingryntih ha kaban leh ia ki ‘stunt’ ia ki liengsuin iapom kaba la khring ia ki nongpeitkai baroh ban iohi ia ka jingtbit ki shipai liengsuin jong ka ri.
Nalor ka jingpynshoh biej jong ka Aerobatic Air Display jongki 9 tylli ki liengsuin iapom jongka Surya Kiran Aerobatic Team kala don ruh ka jingpyninam na ki nongniah ia ka SKAT, Sukhoi-30 MKI, Rafale bad Chetak/ Cheetah Helicopter ha katei ka Air Show.
U Lat ka jylla Meghalaya u Phagu Chauhan ryngkat bad u Myntri Rangbah ka jylla u Conrad K Sangma, kila wan ban iashimbynta ha katei ka Air Show ha ryngkat ka jingdonlang ki heh jong ka Indian Air Force, ki heh shipai bad ki samla pule.
U Conrad Sangma ula iaroh ia ka Surya Kiran Aerobatic Team ia ka jingitynnad iaka rukom pynher ia ki liengsuin iapom ia kaba ym lah ban mutdur ne poi pyrkhat bad ula ong ba kane kadei ka sien kaba nyngkong eh ia u ban sakhi ia ka Air Show.
“Kane ka Air Show mynta ka sngi kala pyni ia ka jingtbit, ka jinglah kaba ka Air Force ka jong ngi ka don bad ka long ka jingsngew sarong ia baroh ki nong India. Ha ka liang jong baroh ki nongshong shnong ka Meghalaya nga kwah ban pynpaw ia ka jingsngewnguh ia ki bad nga kwah ruh ba kin tip ba baroh ki nongshong shnong ha ka ri ki sngew sarong ia ki bad ia ka jinglen lade ka jongki bad ka jingbahkhlieh kaba kila pyni na ka bynta ki paidbah bad iaka ri hi baroh kawei” ong u Conrad Sangma.
Ula ong ba kane kadei ruh ka lad kaba ki khynnah bad ki samla kin ioh ia ka jingpynshlur ban shakri ia ka ri ha ki kyrdan ki bapher bapher.
“Ka Surya Kiran Team mynta ka sngi kala pyni bad leh ia kaei kaei kaba ngam lah ban mutdur bad kane kadei ka sien kaba nga la shong bha ban peit ia ka Air Show kaba kum kane kaba la pynshohbiej shisha ia nga” ong u Myntri Rangbah.
Ula ba ki shipai bapher bapher kila shimkhia bad trei shitom ban poi sha ki samla bad ki paidbah jong ka thain shatei lam mihngi khamtam ha kaban pynshlur ia ki samla ban rung ha ki kam shipai.
Ula ong ba jan baroh ki tnad shipai bad ki Commandant bad ki kynhun pynrungkam kila wan iakynduh ia u la bunsien ban pynpaw ia ka jingsngewkhia ban lah ban pynthikna ba kan don ka jingiashimbynta.
“Ki don bun ki sienjam kiba la shim mynta bad ha ka jingshisha kiba bun ki jingpynrungkam kila long ruh ha ki shnong ki thaw ia kaba kila da leit khnang” ong u Conrad.
Katba u Wing Commander u Rajesh Kajla ula pyntip ba kane kadei ka 5 ba la pyninam ia ka jingtbit bad jingshlur jong ki shipai liengsuin haka thain shatei lam mihngi jong ka ri.
“Kane ka Air Show la pynlong da ka jingthmu ban ai mynsiem ia ki samla bad kane ka jingpyninam kala sdang na Bagdogra, Jorhat, Chabua, Itanagar, Tezpur bad mynta ha Shillong bad kane ka dei ka jingpynkut ia kane ka jingpyninam bad ngin leit phai biang noh sha ka Base ka jong ngi ha kaban ngin leit ban pyntbit biang ialade ban pynkhreh na ka bynta kiwei pat ki jingpyninam” ong u Kajla.
