Shillong, Risaw 27 : U Myntri ka Tnad Pule Puthi Rakkam A Sangma, ula pynshlur ia ka Voice of the People Party (VPP) kaba don ha ka Liang Pyrshah, ba kan ai ia ki jingkynthoh kiba tei lem bad ki jingai jingmut ha ka jaka ban shu pynrem.
U Myntri ula kynthoh ia kane halor ka jingdawa jong ka VPP ia u Myntri Rangbah ka Jylla Conrad K Sangma, ban weng noh ia u Myntri ka Pule Puthi na ka kam ba u bat.
Ka VPP kala thoh sha u Myntri Rangbah ka Jylla dang shen bad pynpaw ia ka jingsngewkhia halor ka jingbym iahap jong u Rakkam A Sangma ban bat ia ka Tnad Pule Puthi haba kynnoh ruh ba une u Myntri um da tip satia shaphang ka Tnad ba u bat.
U Rakkam haba iakren bad ki nongthoh khubor, ula ong “KI (VPP) dei ki briew kiba la nang la stad, kumta ngi (Sorkar) khmih lynti ia ki ym tang ban shu kynthoh hynrei ngi khmih lynti ba kin ai jingmut ruh. Baroh, la ki dei kiba don ha Liang Pyrshah ne ha ka Sorkar, ngi don iala ki jong ki jingbahkhlieh ha kaban shakri bad noh synniang sha ki paidbah”.
Ha kauh ka por, u Myntri ula pan ruh ia ki jingai jingmut na ka VPP haba pynpaw ba kaei kaba ki pyni kan dei kaba kor, la ka dei halor ka kamram jong u kum u Myntri ne ia ka Tnad Pule Puthi baroh kawei.
Haba mynjur ba ka Meghalaya ka dei ka ‘Jaka pdeng ka pule puthi” jong ka thain Shatei Lam Mihngi, u Myntri ula pdiang sngewbha ia ki jingnoh synniang ki stad ki jhad ba kynthup ia ki academician, scholars, ka ban ai jingmyntoi shikatdei eh ia ka Jylla.
U Myntri ula ban jur ba ka Sorkar Jylla bad ka Liang Pyrshah ki don iala ka kamram ba dei ban leh ha kaban pynwandur bad kyntiew ia ka Jylla.
