Shillong, Risaw 27 : Ka Hynniewtrep Youth Council (HYC) ha ka sngi Thohdieng kala iakynduh ia u Myntri ka Tnad Pule Puthi Rakkam A Sangma, ban iakren halor ki kam pule dangle ha West Khasi Hills bad Ri-Bhoi District.
Ia ka HYC la ialam da u President ka HYC Roykupar Synrem nalor u President barim ia kaba la synran da ki Unit ka HYC.
Haba iakren bad ki nongthoh khubor, u Roykupar ula ong ba ha West Khasi Hills, ki don kumba 90 tylli ki skul LP ka Sorkar hapoh ka District ha kaba ka jingdon ki khynnah skulk ka long hapdeng 50 haduh 100 ngut kawei pa kawei ka skul.
U iathuh ba ha man ki skul, ka Sorkar kala thung 1 ne 2 ngut ki nonghikai ban hikai ia ki khynnah bad kine ki nonghikai ki hap ban shim klas ia ki khynnah naduh nursery haduh klas V.
“Ngi la daw aba dei ban thungkam noh mar mar ia ki nonghikai bad u Myntri ula kular ba naduh u bnai ban wan, ka jingthungkam kan sa iaid noh” ong u Bah Roykupar.
Une u Nongialam ka HYC ula ong ba ka jingbym don ki nonghikai kat kum ka ratio bad ka jingdon ki khynnah kala ktah jur bha ia ka pule dangle ha ka District bad kane ka dei ka jingleh bymhok ia ki khynnah kiba leit pule ha kine ki skul.
Ka HYC kala dawa ruh ba ka Sorkar ka dei ban phaikhmat kyrkieh noh ha kaban maramot ia ki iingskul ka Sorkar kiba la jot bad pei. “Lada shu ieh, kiba bun na kine ki skul kin ym lah shuh ban shakri ia ki khynnah ha u snem ban wan. Kumta,ngi kyrpad ia phi ban shimkhia mar mar halor kane ka kam” ula ong.
Ki jingtei bad ki miej ki shuki ruh ki dei shibynta na ka jingdawa naba bun bun ki skul ha ki District kim shym la ioh satia kat kum ki jingdonkam.
Une u President ka HYC ula ong ba ka seng kala dep pynlong ia ki jingjurip bad shem ba ha baroh ki 30 tylli ki skul ba kila wan iuhkjat, khamtam ki skul LP, ki khynnah skul ki hap ban shu iaphngian ban iashong ha kawei ka ben namar ka jingbym duna ki ben shong.
Ka HYC kala kyntu ruh ban pynbiang noh ia ki jingdonkam ba kongsan ha ki skul higher secondary ba dang shu plie jong ka Sib Sing Memorial Govt School. Ia kane ka skul la plie ha ba sdang jong une u snem hynrei haduh mynta kam pat ioh satia ia ka bording elektrik, ka um bad kiwei kiwie ki jingdonkam.
Na ka liang u Myntri Rakkam A Sangma ula pyntip ba ka Tnad Education shen kan sa thung noh ia ki Nonghikai bala pass ia ka MTET ban pyndap ia ki jaka ba thylli. U pyntip ba ka Interview ia kane ka kam, kan long ha ka 15 tarik Naiwieng.
“Ka interview ia kiba la pass ia ka MTET kan long ha ka 15 tarik Naiwieng ban pyndep ia palat 1200 tylli ki kam hikai ba lait ha ki skul LP ka Sorkar bad palart 400 ha ki skul UP” ulaong. Ngin pyrshang ban pyndep ia ka jingthungkam baroh hapoh u 2023” ong u Rakkam.
