Shillong, Naiwieng 8: U Symbud Myntri Rangbah ka jylla Bah Sniawbhalang Dhar ula kyntu ia ki samla ba kin pynleit jingmut ha kaban sengkam lajong ym ban shu ap tang ia ka kam sorkar bad kane ka rukom pyrkhat ka long kaba bakla bha ban ong ba ka jingnang jingstad kan ialam sha kaban ioh ia ka kam sorkar.
Haba kren ia ki samla jongka Nartiang constituency ha ka jingialang kaba la pynlong da ka NPYF ha ka sngi Thohdieng, u Bah Dhar ula ong, “Haba bteng ia ka jingpule wat nym buhthong tang halor kawei ka thong. Lada ka thong jong phi kadei beit thik ban long nongtrei sorkar, ka jingmut jong phi kala long lypa kaba khim. Ka jingioh kyrdan ka jong phi ka long kaba kongsan kaba lah ban ialam sha kylleng ki jaka, kam dei satia ka tiket ban ioh kam sorkar. Ha ka jingshisha kiba bun ki riewshimet kiba seisoh hapoh ri India kila kynriah na ka kam sorkar sha ka jingseng kam lajong, ka jingwad ia ki lad bad ki kabu kiba bun kaba ka jingnang jingstad ka lah ban tyrwa”.
U Bah Dhar ula iathuh ia ka jingshem ka jongu da kaba ong “U Paralok na Bihar, uba pule college bad nga ha St Edmunds, ngi lah iakynduh hadien 18-19 snem ha kawei ka jingkhawai kyntiew kurim. Nga kylli phi leh aiu ha ka jingim, ula iathuh ba ula iehnoh ia ka kam sorkar, nga lah kyndit bad kylli balei, kumta ula ong ba ha ka kam sorkar u ioh tang T.45,000 ha ka shi bnai bad ym lah ban pyndap pynbiang ia ka jingdonkam. Mynta ula plie ia ka dukan khapsniuh ha Patna bad kamai T.3 lak ha ka shi bnai. Kane kadei ka jingseng kam lajong”.
Ula banjur “Ba ym dei ban kheinpoh ia ka kam.ne jingtrei.Wat nym ong ba nga dei tang u nongniah trok, ka kamram.ka kong phi ka long kaba kongsan na ka bynta ka ioh ka kot jong ka jylla bad khlem ma phi, ki marbam.mardih kiba kongsan kum ka mluh bad shini kin ym lah ban poi sha ki shnong ki thaw. Man la ki kam ki don iala ka jongka burom bad ka jingkordor. Ka kam rep kadei ka kam kaba donburom bad kaba kongsan bha, ha kaba ka sorkar pdeng kala bhah bun ia ka Mang tyngka na ka bynta ka rep ka riang. Kumjuh ruh ki nongseng kam lajong kiba khaii ia u mawshun, sying, ki masi bad ki jingri kila jam shakhmat da kaba tei ia ka khaii pateng kaba seisoh bad ka jingim kaba pahuh pahai. Ka kam jong phi ka long ka bynta kaba kongsan bha ia ka imlang sahlang, kumta longtrai ia ka bad ithuh ia ka jingkordor ka jongka.
U Bah Dhar ula banjur ia ka jingkongsan ban don ia ka thong bad ia ka jingiohi jngai bad ula kyntu ia ki samla ba kin pynleit jingnut bad ban iaid shaphrang.
“Nga kyntu ia ki samla ban pynleit jingmut bha bad ban iaid shakhmat la ka long ha ki skul ne ha ka jingtrei ka jongki.
Da kaba don ia ka thong kaba shai kdar bad ia ka jingiohi jngai, ka kdew ia ka lynti bad ia ka jingthmu.Wat pynslem ia ka rai ka jong phi, namar wat ka jingjied kaba biang ruh ka lah ban long kaba bakla lada la shim rai slem than.
Kaba kham kongsan ka long ba ym dei ban duh jingkyrmen bad ban long kiba iai shah.
U Bah Dhar ula maham ruh pyrshah ia ki jingma na ka jingpyndonkam palat pud ia ka phone bad ula ong ba ka lah ban pynjot pynban lada ym pyndonkam bha ia ka.
