Shillong Nailur 10 : Namar ka jingiatakhuh mawsiang ban ioh jaka ha kaban buh ia ka jaka theh niut ba thymmai ha Ri-lum Khasi bad Jaintia, ka Sorkar Jylla kala rai ban pynshlur ia man ki shnong ki thaw ba kin buh noh iala ki jong ki jaka theh niut hala u jong u pud u sam.
Haba pyntip ia kane ha ka sngi Ba-ar, u Symbud Myntri Rangbah ba khmih ia ka Tnad Urban Affairs Bah Sniawbhalang Dhar ula ong ba shen un sa khot ia ka jingialang ban iakren halor kane ka kam.
“Ngin sa khot ia ka jingialang bad ki Deputy Commissioner (DC) bad ki Block Development Officer (BDO) halor kane, hashuwa ban kut u Nailur. Ai ba ki BDO kin bthah ia baroh ki Rangbah Shnong jong ki Shnong bapher bapher ba kan bha ia ki ban buh noh iala ki jong ki jaka theh niut ha shnong” ula ong haba ai nuksa ia ka shnong kum ka Wahiajer (West Khasi Hills) bad ki katto katne kiba la don la ki jong ki jaka theh niut.
“Ngi pynshlur ia ki shnong ki thaw ban buh noh iala ki jong ki jaka theh niut, khamtam kito ki shnong kiba don bun ki nongshongshnong” ula ong.
Nalor kane, u Bah Sniawbha ula pyntip ba un sa lum ia ka jingialang ha ka sngi Palei ban shong bishar kam halor ka jingtyrwa ban thied jaka na ka bynta ban pynlong jaka theh niut ba thymmai ha kylleng ka Jylla.
“Ka jingeh ban ioh jaka ka don beit. Nga ju kyrpad ia ki paidbah ka Jylla bad ki Seng bapher bapher ba kin iatrei ryngkat ryngkat bad ka Sorkar khnang ba ngin ioh ia ka jaka theh niut kaba biang. Ngi hap ban pyrshang katba lah na ka liang jong ka Sorkar” ula ong.
“Ngin pynthikna ba ki jaka theh niut ba thymmai ki dei ban neh duna eh ia ka 50 snem. Ngin nym ong eh ka jaka theh niut hynrei ka rukom theh niut kat kum ka jingstad saian ha kaba kin nym long kum kiba rim (jaka theh) ha kaba phi leit lum bad wan bret hangne. Kine ki jaka theh niut ba thymmai kin dei kiba la ker bha bad yn pyndonkam ia ki kor ka juk ba mynta. Ynda la biang lut nadong hadong, yn sa pynlong ia ka public hearing bad yn sa shimkhia ia kiei kiei baroh khnang ba ki jaka ba marjan kin ym shah ktah” ong u Symbud Myntri Rangbah ka Jylla.
