Nongpoh, Risaw 25 : Kum ka sienjam ban pyniatylli ia ki khun samla Khasi kiba shong bad kiba la trei ha nongbah Guwahati, ka Khasi Student Union (KSU), Guwahati Unit ka la pynlong ia ka jingiakynduh lang bad ruh ban sam ia ki khusnam bapher bapher sha ki samla pule kynthup ia kito kiba ai jinghikai ha katei ka nongbah kaba la long ha ka Catholic Church Hall, Six Mile, Guwahati.
Ha kane ka sngi, la wan ban ai mynsiem da Myntri Sorkar Bah Kyrmen Shylla kum u kongsan, Bah Eugene Son Lyngdoh, MLA ka Mawphlang, Bah Bajop Pyngrope, MDC ka Rambrai- Jyrngam Constituency, u President ka Khasi Jaintia Students Union Bah Treibor R. Suchen, U DSP ka Ri Bhoi bah S. Pasleiñ bad kiwei kiwei ki nongialam bad ki dkhot ka KJSU, Guwahati Unit.
Haba ai jingkren, u Bah Kyrmen Shylla u la pynpaw ia ka jingkmen kaba khraw ban ia don bynta lang ha kum kane ka prokram ban ai mynsiem bad pynshlur ia ki samla khasi kiba dang pule bad kiba trei ha ki kam bapher bapher ha ka jylla Assam khamtam ruh u la ai ka jingiaroh kaba khraw ia ki nongialam ka KSU kiba la shim ia kane ka sienjam ban pyniatylli ia ki samla khasi kiba don ha kane ka jylla.
U la pynpaw ruh, ba kum ka jaidbynriew, ki samla ki dei ban don ka jingiatylli bad ka jingiatreilang khnang ba kin nang kyntiew ia ka jaidbynriew khasi bad ruh ban kyntiew ia la ka riti dustur bad ruh ba ki dei ban kiar pat na ki jingshah ialam bakla haba ki pule ne shakri ha ki kam bapher bapher kiba don ha ka jylla Assam.
La sam ia ki khusnam ha ki ar tylli ki bynta, ban pynshlur ia kito kiba trei ba ktah ha nongbah Guwahati naduh ki Nurse, ki Doctor, ki nonghikai, ki nongai snam (Blood donors) ba la tip kum ka ‘Appreciation Award’ bad kawei pat ka dei ka ‘Mait Shaphrang Award’ ban pynshlur ia ki samla ba pass bha ha ki examination bapher bapher ba ki pule ha Nongbah Guwahati.
