Shillong, Jylliew 23 : U Myntri ka tnad Pule Puthi Rakkam A Sangma ha ka sngi Nyngkong, ula pynshai ba ka jingpyllait ia ka Umbrella Scholarship ia ki samla pule ST la leh da ka instalment ban pynthikna ia ka jingsam mar katjuh hapdeng ki nongioh bynta.
U pyntip ba ka Ministri ka dang pyllait tang ia ka instalment ba nyngkong bad ia ka pisa yn sa thep sha ki bank account jong ki samla pule ka ban iaid da ki pali pali.
Haba pynshai ia ka pisa ba ioh na ka scholarship, u Rakkam ula batai ba mynshuwa, ka Ministry ka ju pyllait ia ka pisa ba dei baroh sha ki 20000 ngut ki samla pule shisien pyllait katba kiba sah, 40,000 ngut, kin hap ban ap haduh ka instalment kaba bud. Hynrei, ha kane ka kynti, ka Ministry kala rai ban sam ia ka scholarship mar katjuh sha baroh ki nongioh bynta, ka ban long da ka instalment.
U Myntri ula batai ruh halor ka Chief Minister’s Scholarship Scheme, da kaba ong ba ka Tnad ka dang ap ban mih ka jing pynbna jong kane ka skhim. Hadien ba dep pynbna, ki samla pule kin sa ioh sa mar T.6000 marwei na ka CM’s Scholarship scheme, nalor ka Umbrella Scholarship bala ai da ka Tribal Ministry ka Sorkar India.
U Rakkam ula kular ban pyndep noh ia ka jingpyllait ia ki scholarship ki samla pule tang hapoh ka ar ne lai instalment. Hynrei, ula pyntip ba ki don kumba 6000 haduh 7000 ngutki samla pule kibym pat pynbiang thikna ia ki bank account, kaba la pynslem ia ki ba kin ioh ia ka scholarship.
U Myntri ula kyntu ia kine ki samla ba kin pynthikna ba kin leit update ia ki bank account jong ki bad pyniasoh bad u aadhaar khnang ban nym mih kano kano ka jingeh ha ka jingpoi ka pisa jong ka scholarship.
