Shillong, Iaiong 07 : U Myntri ka tnad Pule Puthi Bah Lahkmen Rymbui ha ka sngi Ba-ar, ula pynshai ba ka rai jong ka Sorkar ban pynkiew ia ka bai klas ha ki college Sorkar ka dei tang ka jingbthah bad ieh ha ka jingstad jong ki College.
“Ka Sorkar Meghalaya ka buh ia ka bha ka miat ki samla pule hakhmat eh. Ka post-matric scholarship ka dei kaba thmu na ka bynta ban siew pat ia ka bai klas, bad ngi la pynkiew ia ka” ong u Bah Rymbui haba iathuh ia ka jingpyrshang jong ka Sorkar ban kyrshan ia ki samla pule.
Ula pynpaw ia kane haba jubab ia ka jingkylli halor ka jingpyrshah ki kynhun sengbhalang ia ka rai ban pynkiew bai klas ha ki college Sorkar hapoh ka Jylla.
U Bah Rymbui ula ban jur ba ka rai kam dei ia baroh bad kan ym ktah ia ki samla pule lane ki kmie kpa.
“Lada ki samla pule bad ki kynhun ba don bynta ki mynjur, ai ba kan long kumta. Ia ka jingpynkiew yn sa siew hadien ba ioh ia ka scholarship. Lada kim ioh ia ka scholarship, kim donkam ban siew” ula ong.
U Myntri ula batai ba kane ka sienjam ka dei kaba thmu ban ai ia ka jingtreikam ba laitluid ia ki college, kaba ailad ia ki ban pyniaid hi iala ki jong ki kam ki jam.
“Ngi ieh ha ki managing committee, ki principal, ki student union bad ki nonghikai ban rai ia kaei kaba bha tam na ka bynta ki college jong ki” ula bynrap.
U Bah Rymbui ula kyntu ia ki kynhun ba don bynta ba kim dei ban sngewthuh bakla iaka jingbthah ka Sorkar bad ong “Kane ka pisa kan ym leit sha ka pla tyngka ka Sorkar. Kin hap ban pyniaid hi dalade”.
