Shillong ,Jymmang 14: U Myntri Rangbah ka jylla u Conrad K. Sangma hynne ka sngi Balang ula ong, ba ka Discretionary Funds jong ka Chief Minister’s Special Development Fund (CMSDF) bad Chief Minister’s Special Fund (CMSF) ka dei kawei na ki skhim kiba biang tam, namar ka ailad ia ka sorkar ban sdang ia ki prokram bapher bapher na ka bynta ka bha miat ki paidbah.
“Kane ka skhim ka long kaba iar, kaba khuid ba suba bad ka ailad ban tuklar ia baroh ki kam pynroi ha kylleng jong ka jylla” ula ong, haba ai jingkren ha ka jingialang kaba la long ha Don Bosco Sunny Side, Shillong.
Hapoh jong kitei ki skhim u Myntri Rangbah ula ai jingiarap lyngba ka Chief Minister’s Office bad Chief Minister’s Secretariat kiba khmih bniah ia ki kam pynroi bad ki kam na ka bynta ka bha ka miat ha kylleng jong ka jylla. Ka pisa kaba la pyllait lyngba ka skhim sha ki kynhun, ki sengbhalang bad ki kynhun ki bym don jingiadei bad ka Sorkar, kila wanrah ia ka jingkylla ha ka imlang sahlang.
“Nga sngew sarong ban pyntip sha phi ba kane ka skhim, lada phi kylli ia nga, hadien ba nga lah peit ia baroh ki skhim ha ka sorkar Meghalaya, nga lah ban ong, ba kane kadei ka skhim kaba bha tam eh” ula ong.
Ula pyntip ba ka bhah tyngka ka ailad ia ki projek ki bapher bapher, naduh ki jingdonkam kiba malu mala shaduh ki kam ban maramot bad ban shna pynbha ban pynthikna ban pynbiang ia ka jingdonkam jong ka imlang sahlang.
Haba aiti ia ki P.A. System, Solar Panel bad ki shuki sha ka Dorbar Shnong Sawmer ha Upper Shillong, ula ong “Kane kadei ka shnong ka jong nga, nga sngew kumba nga don ha iing bad kumta ka long kaba kham kyrpang shuh shuh ia nga ban ia don ryngkat lang bad phi kumne”.
Ula pynpaw ba ka jingsam ia ka skhim ka long ha ka por kaba kloi tam bad kila don ki khep ba ia ka skhim la pyllait hapoh jong ka 2 kynta.
“Ka skhim ka ailad ban phah ne Transfer ia ka pisa beit beit sha ki nongioh jingmyntoi” ula ong.
Ha ka jinglut jingsep kaba kot T.20,79,323 la bhah sha ka Dorbar, kaba kynthup ia ka jingpynieng ia ki 120 tylli ki Solar Light, ban thied 600 tylli ki shuki plastik, ban buh ia ki P.A. System na ka bynta ban ai jingpynbna paidbah.
“Nga pynthikna ia phi ba kane kan ym dei kaba kut noh. Ngan dap da ka jingsngewkmen ban ioh ban bteng ban kyrshan ia ka dorbar bad baroh ki dkhot bad ia ki paidbah baroh na ka bynta ki kam pynroi kiban sa wan shuh shuh ha ki snem ban wan” ula ong.
Ula ong ruh, ba ia ki mat kiba ka shnong ka shem jingeh yn sa iapynbeit noh bad yn sa sdang noh ia ki kam ki jam ban tei ia ka top um.
Ula pynbna ruh ba kiwei kiwei ki tiar donkam kiba kynthup ia ki tiar tem yn sa sa pynbiang sha ki kynhun samla jongka shnong.
“Ka tem ka put kadei kaei kaei, kaba nga kwah bha ban kyntiew, phi tip, ha man la ki bynta namar nga ngeit ba ki samla ki ieid ia ka tem ka put bad ia ka rwai ka siaw, ki kwah ban donbynta ha kaei kaei kaba iadei bad ka tem ka put, hynrei kim shym la ioh pat ia ka jingkyrshan kaba kidei ban ioh” ula bynrap.
 bad Chief Minister’s Special Fund (CMSF) ka dei kawei na ki skhim kiba biang tam, namar ka ailad ia ka sorkar ban sdang ia ki prokram bapher bapher na ka bynta ka bha miat ki paidbah.){kind=link}