Shillong, K’lyngkot 10 : U Myntri Rangbah ka Jylla Conrad K Sangma ha ka sngi Thohdieng ula ong ba ka jingkylli kam mih satia ba ka Sorkar ka pyrshang ban pynkylla ia ka Land Transfer Act bad ban iaid lait ia ki Autonomous District Council (ADC) ha ka jingpyrshang jong ka ban thied bad pyllang jaka (land bank) na ka bynta ban pynshlur ia ka jingwan kynshew kam ba kongsan hapoh ka Jylla.
Haba kdew ia ki jingkynnoh bad ki jingsngew ba pyrshah ia ka Investment Meghalaya Agency (IMA) kum ka jingtip kaba bakla, u Conrad ula ong ba ka bakla shaba palat ban ong ba ka Sorkar kan sa pynkylla ia ka Land Transfer Act.
“Ai ba ngan kren shai sha baroh ba ka long ka bym dei satia naba kam don satia ka jingpynkylla ia ka Land Transfer Act. Ka jingkylli kam mih ruh ba ngin iaid lait ia ki District Council (Ki Khlieh Nongsynshar/Rangbah Shnong). Ka jingkylli kam mih satia ba ki kompani shimet kin wan bad thied jaka hi dalade. Kam shym la don ka jingpynkylla ia kine, ym shym la leh eiei bad ngin ym leh eiei hi ruh ia kane ka bynta” kular u Conrad.
Haba kren biang halor ka rai jong ka Kynhun Myntri halor kane ka kam, u Conrad ula ong ‘Naduh ka sngi kaba nyngkong, ka jingkylla kaba ngi wanrah ka long ba ngin ailad ia ka IMA ba kan thied jaka bad ban pyllang ia ki jaka kumba leh ka MIDC bad MTDC. Kane ka dei ka agency ka ban kyntiew ia ka jingwan kynshew kam ha Jylla”.
“Halor ka jingong jong ki katto katne ki lad pathai khubor ba ngi la kynran dien, ngi khlem kynran dien satia. Ka jingshisha hi ka long ba phi la ai ia ka khubor ba bakla naduh kaba sdang. Ngi shu pynshai ba ki jingthoh jong phi ki bakla bad naduh ka sngi nyngkong ngi la ong ba ka jingkylli kam mih satia halor kine ki lai tylli ki mat” ula ong.
“Lada dang don kiba sngewkhia la ka dei kino kino ki kynhun, agency ne district council halor kane, ngi long kiba kmen eh ban iakren, ngi long kiba kmen eh ban pynshai ia kane ka kam” ula bynrap.
Haba batai ia ka kamram jong ka IMA, u Conrad ula ong “Ka IMA ka long kum kawei pat ka bor treikam jong ka Sorkar Meghalaya. Ka dei ka shnat ha kaba ki briew kin aplai ia ka jingbit ba kin sdang iala ki jong ki kompani bad ruh ban ioh ia ki subsidy kiba ka Jylla bad ka Sorkar Pdeng ki ai”.
“Mynshuwa ka ju don da ka Single Window Agency (SWA) hynrei ka SWA ka kham pynleit jingmut sha ki karkhana. Mynta ngi don ka jingkynshew kam ha ka koit ka khiah, ka kam pynmih bording, ka kam jngohkai bad ka pule dangle. Kumta, ban seng ia ki jaka pule, ki dei ia ki ban leit sha ka Tnad Education ban ioh jingbit ne sha ka tnad Industry lane lada don ba kwah seng Hospital, u dei ban leit sha ka Tnad ka Koit ka Khiah lane u dei ban leit sha ka Single Window Agency ban ioh jingbit. Namar kine ki jyrwit jyrwat, ngi la rai ban wanrah noh da ka IMA, ha kaba baroh ki Tnad kin iadon lang” ong u Conrad.
 ha ka jingpyrshang jong ka ban thied bad pyllang jaka (land bank) na ka bynta ban pynshlur ia ka jingwan kynshew kam ba kongsan hapoh ka Jylla.){kind=link}