Shillong, Kyllalyngkot 10: U Myntri Rangbah ka jylla u Conrad K Sangma ula ong ba ka sorkar jylla kam pynbor ia kino kino ki college ban pyniasoh bad ka Captain Williamson Sangma State University, kaban sa plie noh ha ka 13 tarik u Kyllalyngkot.
Ula kren ruh da kaba shai ba kan ym don pat kano kano ka jingpyllait na ka jingpyntreikam ia ka Common University Entrance Test (CUET) na ka bynta ki college, kiba bteng ban pyniasoh bad ka skulbah North Eastern Hill University (NEHU).
Haba iakren bad ki nongpathai khubor hadien ba la wai ka jingialang jong ka kynhun myntri, u Sangma ula ong “Bun ki briew ki lah kylli ia nga ia katei, ba ki college kila iohpdiang (ki jingpyntip) na ka state university ban kylli la ki kwah ban pyniasoh noh bad ka state university. Nga kwah ban pynshai ba ia ki college bad ia ki nongshong shnong baroh ba ki college ki hap pyniasoh bad ki skulbah hynrei kan shong pat ha ka mon ka jongki la ki kwah ban pyniasoh bad ka NEHU ne USTM ne bad ka Captain Williamson Sangma State University.”
“kam don kano kano ka jingpynbor iano iano ban pyniasoh bad ka Captian Williamson Sangma State University. Ngi ai ia phi ia ka lad ban pyniasoh bad ngi. Kaei kaban jia lada phi pyniasoh bad ngi? Tang kawei kaba dei ka kabu ba phin iatreilang bad ka sorkar jylla bad ym bad ka sorkar pdeng ha kaba iadei bad ki jingdonkam kiba bun na ka bynta ka kam pyniasoh. Kumta phin don bad ka sorkar jylla bad ka sorkar jylla kan khmih ia ka jinglong jingman jong ka jylla bad kan ai iaka jingithuh pyniasoh bad kan long kaba suk bha ka rukom pyniaid ia ka kam” ula pynshai.
Ula ong ba kan ym don kano kano la jingpyllait ia ka eksamin CUET naduh ka samoi pule kaban wan iaka Meghalaya.
U Conrad Sangma ula ong “Kaei kaba kongsan bha ka long ba ki colleges, kiba bteng ban pyniasoh bad ka NEHU, kin hap bad ki samla pule kiba leit wad jaka pule ha ki they college kiba pyniasoh bad ka NEHU kin hap ban leh iaka eksam CUET. Ha u snem ban wan haba sdang ka samoi pule, lada kano kano ka college ka dangbpyniasoh bad ka NEHU bad lada ki samla pule ki wan ban kyrpad ia nga ban pyllait na ka eksam CUET, Ngam lah shuh ban leh eiei biang ia katei namar ba ka nongrim ba ngi kyrpad ban pynllait iaka CUET kadei namar ba ngim don ia la ka state university.”
Ula ong “Ngi dei tang ma ngi ka jylla ha ka ri ka bym don ia ka state university bad katei ka jia namar ba ngi don pat ia ka NEHU bad ngi la sngew ha ki por kiba la leit ba ngim donkam”.
Haba la mih ka CUET, ngi la sngew donkam mardor ban don noh ia la ka jong ka state university bad kumta ngi lah thoh sha ki college ba lada ki kwah ne thrang ban pyniasoh noh bad ngi ba kin pyniasoh hynrei lada ki kwah ban bteng ban pyniasoh bad ka NEHU ki lah ban iai bteng . Ngim pynbor iano iano ruh, kan shong beit ha ki baroh ban shim ia ka rai hynrei kumba nga lah ong kan ym don shuh ka jingpyllait ia ka eksamin CUET”.
