Shillong, K’lyngkot 11 : U Myntri Rangbah Conrad K Sangma ha ka sngi Thohdieng ula ong ba kan don ka jingia duwai hynrei ka jingkylli kam mih satia ba kan don ka jingpynkyntang niam ha ka jingplie ia ka Capt Williamson Sangma State University la 13 tarik Kyllalyngkot.
Kane ka jingkren jong u kala mih kum ka jubab ia ki kynrum kynram kiba mih hadien ka jingkren ba dang shen jong u Myntri ka Tnad Pule Puthi Rakkam A Sangma ba ka Sorkar kan pynlong ia ka jingduwai niam Khristan kaba heh bha na ka bynta ban pynkyntang ia kane ka University ba nyngkong ka Jylla.
“Nga sngew ba u Myntri ka Tnad Pule Puthi ula dep ban jubab ba ula shah pynman bakla ka jingkren halor kane ka kam. Ngam shym don lang ha ka por ba u Myntri u kren ia kane bad ngam don lang hi ruh haba u jubab ia ka, kumta ngam tip ia kaei kaba u kren. Hynrei nga shu ong ha phi ba kane kan dei beit ka prokram ka Sorkar Jylla ha kaba u Vice Chancellor un sa shimti noh ia ka kam bad kane ka prokram kan iaid kat kum ki jingpynbeit ka Sorkar” ong u Conrad.
Haba pyntip ba la khot sngewbha ia baroh sha kane ka jingialang plie, u Myntri Rangbah ula ong “Ngi la khot ia baroh ki Nongialam Balang, Nongialam Niam- la khot sngewbha ia baroh ba kin wan hynrei tang kawei ka kam ba ngi leh hashuwa ban sdang ka prokram kumba ngi ju leh ha kiba bun ki jaka ka long ban ngin pyndem ha ki jingduwai bad kam don jingleh bakla satia halor kane”.
“Kumta, ka jingia duwai kan long hynrei ka jingkylli ba kan don ka jingpynkyntang te kam don re. Kan dei beit ka prokram jong ka Sorkar ha kaba la khot sngewbha ia baroh ki briew na kino kino ki niam, ki jait, ki seng, ki myntri Sorkar bad ki Ophis namar kane ka dei ka khyllipmat kaba kongsan eh ia ngi” ula ong.
