Shillong, Naiwieng 03: U Myntri Rangbah ka jylla u Conrad K Sangma hynne ka sngi ula pynshai ba ka jingshah kem u Bah GK Iangrai uba long u heh ophisar pulit ka jylla kam dei satia halor ka jingkynnoh ba ula donkti haka jyrsieh thied kali hynrei kadei halor ka jingshna ia kawei ka jingtei jong ka tnad pulit kaba la tip ka National Emergency Response System (NERS) Building ha Sadar Police Station.
“Nga kwah ban pynshai sha baroh ba kila don kiba pynmih ia ka khubor ba ula shah kem namar ka jyrsieh thied kali bad kane ka long kaba bakla shibun” ong u Conrad.
“Ngi lah dep ban kren mynshwa ruh ba kam don satia ka jyrsieh thied kali hynrei kala don ka kynrum kynram ha ka rukom bhah iaki kali hynrei kam dei pat ka jyrsieh thied kali” ula bynrap.
Ula ong, ka jingshah kem u heh pulit kadei halor ka jingshna ia kawei ka building kaba la mang naka bynta ka tnad pulit bad ha katei jingshna iaka Building kala don ka jingkynnoh ba kala don ka jingpyndonkam bakla iaka pisa ha katei ka bynta bad dei halor kane, ka tnad pulit kala ujor iaka ejahar bad kala pan jingbit na ka sorkar ban shim ia kane ka sienjam.
U Myntri Rangbah ula ong, ba dei halor katei ka jingkynnoh la sdang iaka jingtohkit bad kam don bynta eiei bad ka jyrsieh thied kali kumba la pynpaw ha ki katto katne ki kot khubor.
“Ia mynta hi ka jingtohkit kan iaid shakhmat bad ka aiñ kan sa leh ia kaba donkam bad halor katei, ia kaei kaba ngi dei ban leh yn sa leh da kaba iaid katkum ki kyndon aiñ” ong u Conrad.
Haba kylli la ka sorkar kala weng kam shipor ia une u heh pulit, u Myntri Rangbah ula ong, “Ngam don iaka jingtip kaba paka ha kane ka por hynrei ka jingweng kam shipor kam dei ka kam kaba heh”.
