Shillong, Naitung 05 : U Nongialam ka UDP bad Myntri Sorkar Bah Paul Lyngdoh ula pynshai ia la ka jong ka jingkren da kaba ong ba ka HSPDP kan nym pat weng satia ia ka jingiatreilang ha ka Regional Democratic Alliance (RDA) hynrei ka kwah ban iakhun ia ka elekshon MDC la ka jong.
“Namar ia kane ka kam ym pat shym la aiktien satia sha ngi, ngin sa lah ban iakren kham bha ia kane ka kam ynda ka Alliance kala iakynduh” ong u Bah Paul.
Hynrei ula ong, ka UDP bad ka HSPDP kin sa iakynduh shen ban iakren ia ki kam ki jam kiba iadei bad kane ka bynta.
Lah ban kdew ba une u Nongialam ka UDP ula pyntip hynnin ka sngi, ba ka HSPDP kan sa mih noh na ka jingkyrshan ia ka RDA.
Ym tang kane, ka jingiakren kala iaid ruh halor ka jingbym sngewhun jong ki katto katne ki nongialam ka UDP ban dang ia donlang ha ka Sorkar MDA, ia kaba u Bah Paul ula pynshai ba ki don katto katne ki nongialam ka UDP kiba sngew iakata hynrei kiba bun hi ki dang kyrshan ban iadonlang ha ka MDA.
“Ka jingpynsngew jong kiba bun hi ka long ba ka elekshon 2023 ka dei ka rai jong u paidbah bala ai sha ka MDA” pynshai u Bah Paul.
