Shillong, Jymmang 27 : Ka Sorkar Jylla ha ka sngi Balang kala pyntip ba baroh ki jingleit bar ri jong ki Myntri ki dei kiba la ai jingmynjur da ka Sorkar Pdeng bad Sorkar Jylla hashuwa ka jingpynjari ia ka jingpyrrkhing leit bar ri.
Ha ka kyrwoh, ka Tnad Personnel & Administrative Reforms ka ong ba ki jingleit bar ri ba shah kylli jingkylli ka dei kaba la ioh jingbit na ka Sorkar Jylla bad ka Ministry of External Affairs.
“Kine ki jingleit bar ri ki dei kiba la thmu lypa ki bnai bad ruh ki donkam ia ka jingai jingbit jong ka Ministry of External Affairs, ka Sorkar India” ong u Secretary ka Tnad Personnel & Administrative Reforms haba pynshai ia ka khubor ba mih ha ka kot khubor The Shillong Times.
Kat kum ka kyrwoh, ym shym la don satia kano kano ka jingai jingbit ba thymmai naduh ba mih bad treikam ki kyndon thymmai bala buh da ka Sorkar India.
“Baroh ki jingleit shabar…lah mynjur da ka Sorkar Jylla bad ka Sorkar India hashuwa ka jingpynbna ia ki jingpyrrkhing leit bar ri” ong u Secretary.
“Ym shym la don ka jingleit bar ri ba thymmai kaba la mynjur hadien ka jingpynbna ia ka jingpyrrkhing leit bar –ri da u Myntri Rangbah Duh ka Ri bad ka jingbthah bala pynmih da u Myntri Rangbah ka Jylla” ong ka kyrwoh.
