Guwahati, Jymmang 27: Ka Assam ha kane ka sngi Ba-ar ka la mynjur ia ka UCC bill hapoh ka Iingdorbar Thaw Ain bad long ka jylla kaba lai ha ka ri hadien ka Goa bad Uttarakhand ban pyntreikam ia ka UCC .
Ka jingpyllait ia ki riewlum na ka UCC ka pyni ia ka jinglong ba jylliew jong ki riti dustur ka thain shatei lammihngi bad ka jingiada jong ka riti synshar bad ka rukom ba ka BJP ka la buh ia ka ain kum ka sienjam sha ka “jingbishar hok hapdeng ki shynrang bad kynthei” bad ka jinglong mar kumjuh ha ka ain.
Ka jingmynjur ia kane ka bill ka la long ka jingiatai kaba jur bha hapoh ka iing dorbar ha kaba u myntri rangbah ka jylla u Himanta Biswa Sarma u la pynkhih ia ka jingmut jong ka UCC ym tang kum ka agenda jong ka BJP hynrei kum ka jingbthah jong ka riti synshar ka bym pat urlong kaba ka Congress ruh ka la pynskhem shisien.
“Ia ka UCC la tyrwa nyngkong eh da ka Congress; u Nehruji u dei u ba kongsan jong ka”, la pynskhem u Sarma ha ka jingiatai, da kaba shim bunsien ïa ki jingïakren ha ka por ba pynlong ïa ka Constituent Assembly proceedings ban ai jingmut ba ka jingmut ka la don lah slem bha shwa ka jingïapher ha ka saiñ hima sima.
Hynrei ka jingiatai hi ka la pynshai kaba dang iai bteng ha ka niam bad ka sain pyrthei kaba don sawdong jong kane ka mat.
U Sherman Ali Ahmed, MLA ka Trinamool Congress, u la mih jyndat bad rah ruh u la pynpaw ka jingpyrshah, ia ki katto katne ki kyndon jong katei ka bill, wat la um shym la kyntait ia baroh ki bynta jong ka, khamtam ia kito kiba thmu ban ialeh pyrshah ia ka jingshongkha khynnah bad ka jingshongkha bun tnga.
“Ngan kyrshan ia ka UCC; ngan thep vote wat ban kyrshan ia ki katto katne ki bynta haba iadei bad ka jingpynsangeh ia ka jingshongkha khynnah, ban tehlakam ia ka jingshongkha bun tnga.Hynrei, nga la iohi ia ki katto katne ki kyndon kiba rung shapoh ki rukom niam shimet jong ka niam Islam,” la ong u Ali ha ki nongthoh khubor hadien ba u la mih jyndat.
U la kynthoh ba watla ka Quran ka ailad ia ka jingshongkha bun tnga, tang ynda la pynthikna ia ka hok bad ka jinglong mar ryngkat kaba pura, katto katne ki bynta jong ka ain ba la tyrwa kaba iadei bad ka jingiathoh shong kurim bad ka jingshongkha biang ka long ka jingpynthut ia ki kam niam.
“Ki leh ia kine baroh da ka jingthmu kaba sniew.Ki thombor ia ka hok ba kongsan jong nga ban leh ia ka niam jong nga,” u la kynnoh.
Pynban, ka sorkar jylla dang shen ka la kham pynleit jingmut ban pyni ia ka ain kum ka mat synshar bad ka hok jong ki kynthei ban ia kaba shu pyni ia ka niam bad ka jingmut jingpyrkhat.
Ha ka por ba don ka jingiatai nia, u Sarma u la kynnoh ia ki dkhot ka Congress ba ki la pynkylla ia ka jingiakren tang sha ka jingiada niam.
“Phi dei ki briew ba iada tang ia ka niam.Phi ki briew phi pyndonkam ia ka Quran ban batai ia ki bynta hynrei phim ju pule ia ka Bhagvad Gita…Phi ki briew phi dei ki communal party “, u la ong bad bynrap ba ka Congress ka la “pynlong ialade kum ka communal party “.
Shuh shuh u CM u la ong ba ka Assam kan long “ka jylla kaba lai ban pyntreikam” ia ka rukom treikam jong ka UCC bad u la ong ba katei ka ain ka long ban pynkhlain ia ka “jingbishar hok hapdeng ki shynrang bad kynthei”.
Hynrei, ka jingshim kaba khraw tam ha ka sain pyrthei ka lah ban long ka jingpyllait ia ki riewlum jong ka Assam na ka UCC.
“Ki riewlum kim shym la hap hapoh ka UCC namar ba ka la long ka dustur bad naduh ki spah snem ki bud ïa ki rukom leh riti dustur kiba long ki bynta ba kongsan ha ka imlang sahlang jong ki,” ong u Sarma.
“Ki riewlum jong ka thain ki bud ia la ka jong ka jait jinglong kawei lyngba ki riti dustur jong ki. Ngim shym la thmu ban tuklar ia ki hok jong ki kiba la ai katkum ka riti synshar”, u la ong.
Ka jingpyllait ka pyni ia ka jingshisha jong ka riti synshar jong kiba bun ki thain shatei lam mihngi, ha kaba ka ain riti dustur jong ki jaitbynriew ka synshar ia ki jingiadei shimet kum ka jingshongkha, ka jinghiar pateng bad ki jinglong jong ka iing ka sem ha kylleng ki jaitbynriew bad ki thain ba synshar hi.Ka jingpynjari ain paidbah kaba jur bha ha kane ka thain ka la iakynduh mynshuwa ia ka jingpyrshah kaba jur bha ha ka liang ka ain bad ka sain pyrthei.
Ka ain ka kren shaphang ka jingshongkha, ka jingiakhlad, ka jinghiar pateng bad ka jingiadei kaba sah lang bad ka khang ia ka jingshongkha bun tnga bad ka pynlong ia ka jingpynrung kyrteng ia ki jingshongkha bad ka jingiadei lyngba kaba ia sah lang ne ka live-in relationships ka donkam tam.
Hynrei, nalor ki jingtip ba kyrpang jong ka aiñ, ka Assembly proceeding ha ka sngi Ba-ar ka la pynpaw ïa ka thma kaba kham khraw-kawei jong ka BJP kaba thmu ban pyni ïa ka UCC kum ka jingdonkam jong ka riti synshar bad kum ka kam synshar, katba ka Liang Pyrshah ka dang bteng ban kheiñ ïa ki bynta jong ka kum ka jingshah thombor ïa ka jinglaitluid ha ka niam.
Na ka bynta ka Assam, ka aiñ ka lah ruh ban ai dak ïa ka jingwan jong ka rukom ba kyrpang jong ka UCC na ka thaiñ shatei lammihngi: kawei kaba kyrshan ïa ka jinglong kawei hynrei kaba dang burom ïa ki riti dustur jong ki jaitbynriew riewlum bad ka jingsynshar hi.
