Pyntip u CM ba dang buddien katba dang wad ia kiwei ki lad jingiada
Shillong, Rymphang 18 : U Lamphang ka Iingdorbar Thaw Ain Thomas A Sangma ula pynsangeh ia ka Dorbar haduh 10 minit ha ka sngi Balang hadien ba mih ka jingiania bad jingiakyrkaw kaba jur hapdeng ka Liang Synshar bad Liang Pyrshah halor ka rai jong ka Sorkar ban pan ia ka jingithuh kum ka Protected / Restricted Area ia ka Meghalaya hapoh ka Immigration and Foreigners Act, 2025.
Ka jingiakyrkaw kaba thnem bha kala mih hapdeng ki Dkhot ka Iing namar ka jingbym iahap jingmut ia kane ka mat katba ka jingdawa ia ka Inner Line Permit (ILP) ka dang ap ban ioh jingmynjur.
U Lamphang ula hap ban ieng na shuki bad kyntu ia ki dkhot ba kin iashong hala ki jaka shong hynrei namar ka jingbym ba sngap, ula pynbna noh : “Ngan pynsangeh shuwa ia ka Dorbar haduh 10 minit”.
U MLA ka VPP Bah Ardent M Basaiawmoit ula kynnoh ba ka Sorkar kam don jingmut ban shimkhia hok halor ka ILP.
“Balei ka Jylla ka kwah ILP? Namar ka jingwan rung ki briew ba nabar kam dei tang ia ki mynder ri hynrei kiba nabar Jylla ruh….Nga kwah ia ka jubab kaba hok la ka Sorkar ka ialehkai bad ka jingsngew jong ki paidbah” ula ong.
U Myntri Rangbah ka Jylla Conrad K Sangma ula kyntait ia ka jingkynnoh bad pyntip ula dep thoh bad iakynduh ia u Myntri Rangbah Duh bad Myntri kam Pohiing ka Ri la bunsien halor ka ILP bad ula kob ruh ia u Bah Ardent Basaiawmoit : “Katno sien ba u MLA ba don burom ula thoh sha u Myntri Rangbah Duh bad Myntri kam Pohiing? Hato um shym pat iakynduh satia ia u Myntri kam Pohiing halor ka ILP.”
U Symbud Myntri Rangbah Bah Prestone Tynsong uba bat ia ka Tnad kam Pohiing bad Parliamentary Affairs, ula ong ia u Bah Ardent “Lada phi sngewkhia shisha, phi dei ban leit sha Delhi” bad kyntu ia u ban “sangeh ka leh drama”.
Ynda lah pynsdang biang ia ka Dorbar, u Lamphang ula pynnkynmaw ia ki dkhot : “Nga kwah ban pynkynmaw ia kane ka Iing ba kane ka dei ka jaka kaba ngin iakren ia ki kam ha ka rukom kaba don akor. Nga kyntu ia baroh ki dkhot ba kin iashimbynta ha ki jingiatai, jingia kylli jingkylli bad jubab ha ka rukom kaba don akor”.
Haba bteng ban jubab halor kane ka mat, u Conrad ula pyntip ia ka Iingdorbar ba ka Sorkar jong u, ka dang iai buddien ia ka Inner Line Permit (ILP) haba wad ruh ia kiwei kiwei ki lad jingiada hapoh ka Immigration and Foreigners Act, 2025,
“Ngi la iakynduh ia ka Sorkar India lah bun bun sien” ong u Myntri Rangbah haba jubab ia u Bah Ardent Basaiawmoit.
“Katno sien ba u MLA (Ardent) dalade ula leit iakynduh ia u Myntri Rangbah Duh lane ia u Myntri kam Pohiing? U ong ba kadei ka mat kaba kongsan bha- Nga kyntu ia u ban buddien ia kane ha ryngkat bad ngi ha Delhi. Ki Sengbhalang kila leit bad thoh sha ka Sorkar Pdeng halor ka ILP hynrei une u MLA (Ardent) um pat ju thoh. Ngi dei ban leh ia kaei kaba ngi kren” ong u Conrad.
Ula bynrap “Nga pynthikna ba ngim pat sangeh ban buddien ia ka ILP. NGi la buddien bha ia ka hynrei ngi la phaikhmat ruh sha kiwei ki lad jingiada bad kiei kiei kiba lah ban leh. Ngin iai bteng ban buddien ia ka ILP bad kiwei ki lad jingiada ban pynthikna ba ngin lah ban tehlakam ia ka jingwan rung bein ki briew”.
Haba wanrah ia ka jingkylli bynrap, u Bah Ardent ula ong “Lada u Myntri Rangbah u kynnoh ia nga, Nga donkam ban kylli ba katno sien ka Sorkar kala khot lang ia ki khnang ba ngin ialeit iakren lang sha Delhi. U MP jong ngi (VPP) ula kren ia kane ka kam”.
U Myntri Rangbah ula jubab “Ka jingshimkhia jong ngi ka dei ha ka kam. U long laitluid ban leit bad iakynduh ia u Myntri kam Pohiing. Ban shu ai jingkren hi ka biang palat, hynrei ia ngi, ngim ju kren than- ngi ngeit ha ka kam. Ngi kmen palat b aka Liang Pyrshah kan iatreilang bad ngi. Phi buddien hala ka jong ka kyrdan. Ngi pdiang ia kane ka jingaijingmut, hynrei wat pyndonkam ia kane ka iing dorbar ban ong ba ka Sorkar kam shimkhia satia. Kam don jingbakla ban wad ia kiwei ruh ki lad jingiada. Ka jingthmu jong ngi ka long ban wad ia ki lad ki lynti ha kaban tehlakam ia kane ka kam bad ngin iai buddien beit ia ka ILP”.
Haba u MLA ka North Shillong Bah Adelbert Nongrum ula kynnoh ia ka Sorkar ba ka shu pynbiej ia ki paidbah halor ka ILP,u Conrad ula kynthoh kylla bad ong “Lada don mano mano ba pynbiej, ka dei ma u hi uba pynbiej. Man ka por u wan, hynrei um pat don ha ka jingim jong u ban iakynduh ia u Myntri kam Pohiing ka Ri bad pat ju thoh sha u Myntri Kam Pohiing”.
U Symbud Myntri Rangbah Bah Prestone Tynsong ula bynrap “Lada u Bah Adelbert u ong ba ngi shu pynbiej-phi mut aiu da kaba ong pynbiej? Phi lah ban pynshisha? Ai ba un pynshisha”.
Kane ka jingiatai kala iaid palat ia ka por jong ka kynta kylli jingkylli haduh ba u Lamphang ula hap ban tuklar bad ong “Ka kynta kylli jingkylli kala kut. Sngewbha iashong noh”.
