Maham u Bah Ardent ia ki Pulit ba ktah kti ia ki MLA
Shillong, K’lyngkot 22 : Ka Liang Pyrshah Voice of the People Party (VPP) ha ka sngi Nyngkong, kala rai ban pynsangeh shuwa shipor ia ka jingiashong kyllain mungor ba dawa thungkam biang ia ki Ophisar bala weng na Lokayukta hadien ba ka Sorkar Jylla kala kular ban sa iashong jingialang bad ki Nongialam ka Party.
Ia kane ka rai la shim hadien baka Myntri kam ain Kong Ampareen Lyngdoh, kala khot ia ki MLA ka VPP ban iakren ha ka kamra jong ka bad pyntip ba u Myntri Rangbah ka Jylla Conrad K Sangma un sa iakynduh ia ki hapoh ka shisngi ne arsngi duh.
“Naba, kan sa don ka jingialang hapdeng ka party bad u Myntri Rangbah lem bad ki Heh Ophisar ka Sorkar, ngi sngew ba ka dei ia ngi ban pynsangeh shuwa ia ka jingiakhih” ong u President bad MLA ka VPP Bah Ardent M Basaiawmoit haba iakren bad ki nongthoh khubor hadien ka jingiakynduh ia ka Myntri.
Ula ong “Ngi tip thikna ba ka Myntri ain kam lah ban ai kano kano ka rai bad ngim lah ban shim ruh ia kano kano ka rai hynrei ngi kwah ban phah ia ka khubor kaba shai ba kum ka party ngim kwah ban pynmih ia kano kano ka huri hura namar ka rai jong ngi ban mih surok kam dei ban pynmih huri hura hynrei ngi don ia ki daw kiba biang haba ka Sorkar kala shu weng kami a ki Ophisar, ngi sngew b aka dei ka kamram jong ngi ban shimkhia ia kane ka kam bad ngim pdiang ia ka jingpynshai jong ka Sorkar ba kaei kaba kala leh ka dei namar ka jingthung ia kine ki Ophisar ka long pyrshah ia ka ain”.
“Ngi la kren shai hakhmat ka Myntri ba kan pyntip ia kine ki mat ba kongsan sha u Myntri Rangbah khnang ba ha ka jingialang ban wan, ngin lah ban iashong bad iapynbeit ia kane ka kam shisien pynbeit” ula ong.
U Bah Ardent ula ong pat ba ka jingiakhih kan sa iai bteng lada ka Sorkar kam lah ban pynshong nongrim ia ka rai ban weng kam ia kine ki ophisar ka Lokayukta.
Ha kajuh ka por, une u Hehduh ka VPP ula maham ia ki Pulit, kiba kynnoh donkti ha kaban ktah kti ia ki MLA ha ka sngi ba nyngkong jong ka jingiakhih.
“Ka Assembly ka don ia ka Priviledge Committee, ki MLA jong ngi kin sa rah ia kane ka kam. Ngim don eiei pyrshah ia ki (Pulit) hynrei ngi dei ki nongmihkhmat paidbah bad la jied ia ki da ka sur u paidbah” ula ong.
Ha kajuh ka por ka VPP kala pynpaw ia ka jingpyrshah ia ka jingtap durkhmat jong ki Pulit kiba wan tehlakam ia ki nongiakhih.
