Shillong, Nohprah 17 : Ka All Jaiñtia Muster Roll Workers and Labour Union (AJMRWLU) ka la weng noh ïa ka jingïakhih hadien ba ka sorkar jylla ka la kular ban pynkiew ïa ka jingsiew bai bylla katkum ka aiñ Minimum Wages Act 1948.
“Ngi kyrpad ïa u Myntri Rangbah ka Jylla, lada phi don pisa to siew ïa ngi kumba la bthah da ka Minimum Wages Act 1948. Lada ym don, kren da kaba jam bad ba shai,” ong kawei na ki placard ba la pynieng ha ka jaka ïakhih ha madan Malki.
Shwa ia kane, ki nongiakhih ki la byrngem ban pynlong ia ka jingiaid paidbah sha Secretariat bad ban pynlong da ka jingshah thngan khlem pud lada ka sorkar kam lah ban pynurlong ia ka jingdawa jong ki.
“Ngi la pynsangeh noh ïa ka jingïakhih jong ngi hadien ba u Secretary ba dei peit ïa ka tnad pla tyngka u la pyntip ba ïa ka jingtyrwa la mynjur da u Myntri Rangbah bad ïa kajuh la phah sha ka tnad Labour, kaba shen kan sa pynmih ïa ka hukum halor kane ka kam. Hynrei ngim pat tip haduh katno kan long ka dor ba la pynkylla thymmai jong ka bai bylla kaba rit tam”, ong u nongaibuit ka seng u Bah Khroo L Pariat haba iakren bad ki nongthoh khubor.
Katkum ka jingong jong u, kin ap ia ka hukum ka ban pynmih da ka Sorkar bad kin shim ia ka rai kaei ka ban leh.
Shwa ia kane, u bah Pariat u la pyntip ba ka seng ka la rai ban pynlong ia katei ka jingiakhih hadien ba ka sorkar kam shym la lah ban pynkylla ia ka jingsiew bai bylla kaba rit tam, kaba la ktah ia ki nongtrei muster roll haba buh ha ka jingmut ia ka jingkiew dor jong ki marbam mardih.
U la ong ba ka seng ka pyrshah ruh halor ka jingbym pyntreikam ia ka skhim Regular Casual Workers (RCWS) kaba la ai sha ki nongtrei, kiba la trei palat ia ka 10 snem.
Katkum ka jingong jong u, la kynnoh ruh ba ka sorkar kam shym la lah ban ai ïa ki jingmyntoi sha ki muster roll kynthei haba ki kha khun.
