Shillong, Nohprah 17: Ka Meghalaya kala shah pynrem noh ha ka Kerela da 1-0 ha ka jingiakhun ia ka Senior Men’s National Football Championship jongka Santosh Trophy 2024-25 kaba la long ha ka Sngi Baar ha Hyderabad.
Mar ia sdang ka jingiakhun, ki nongialehkai ka Kerela kila lah ban ialehkai bha bad ha ka minit kaba 37 u Muhammad Ajsal ula ioh ban thep ia ka kol kaba la long syndon ka kol kaba la pynjop ia ka Kerela ha ka jingiakhun ha ka Group B.
U Coach ka Meghalaya u Bah Hering Shangpliang, ula pynmih bujli ar ngut ki rangialehkai u Badondor Marbaniang bad u Khrawkupar Jana ha ka kylla miet, da kaba khmih lytni ba kin thaw ia ki lad ban ioh thep kol, hynrei ha kane ka kynti kaba mynta ka kynhun ialehkai jong ka Meghalaya kam shym la lah ban thaw pyrthei eiei kumba kala leh ha ki jingialehkai da kaba thep kol ha ka kylla miet.
Ka jingiakhun hapdeng kine ki ar tylli ki kynhun kala long kaba itynnad ha ka kylla miet, ha kaba ka Meghalaya kala ioh bun tylli ki kabu ban thep kol hynrei kim shym la lah pat ban thep kol.
Ha kawei pat ka jingiakhun ha ka Group B, ka Odisha kala pynrem ia ka Goa da 2-0 bad ka Delhi kala pynrem ia ka Tamil Nadu da 2-0.
Kumba long mynta ka Delhi bad Kerala ki don ha ka kyrdan kaba hakhmat eh da kaba ioh mar 6 point na ki ar tylli ki jingiakhun, katba ka Odisha kaba la ioh 3 point kala wan balai, ka Meghalaya bad ka Tamil Nadu kila ioh mar 1 point bad ka Goa kam pat ioh kamai point eiei.
Tang saw tylli ki kynhun na kawei ka Group kin ioh ban rung sha ka Quarterfinal.
Ka Meghalaya kan iakhun pyrshah ia ka Delhi ha ka Sngi Palei ha ka por 2:30 mynsngi.
