Shillong, Naiwieng 24: Ki nongtrei ASHA hapoh ka shatri jong ka Meghalaya ASHA Workers Union (MAWU) hynne ka sngi kila rai ban weng noh iaka jingiakhih shong kyllain mungor, kaba la pynbeit ban pynlong hakhmat ka khyrdop Main Secretariat Shillong haka 27 tarik mynta u bnai.
Ia kane la pynbna da President ka MAWU Kong Mirajune Myrsing hadien bala wai ka jingialang jong ka Executive Committee (EC) haba iathuh ba haduh mynta ki ASHA kim pat lah ban rai, la ban pdiang ne kyntait iaka rai jong ka Sorkar Jylla ban kyntiew T.1000 ka bai nong lyngba ka Community Base Health Incentives.
Haba iadei bad kane, ki ASHA kila rai ban leit phai noh shala ki jaka trei bad pynpaw ba ka jingialeh ban dawa kyntiew iaka bainong jong ki kam ym pat kut.
Haba kren sha ki lad pathai khubor ka Kong Mirajune kala ong ba ki ASHA kin ap iaka 3 bnai baka Myntri ka tnat ka koit ka pan naka bynta ban iasyllok bad ki Dorbar Shnong hashuwa ban pyntreikam daka skhim thymmai ka Community Base Health Incentives.
“Kumba ka Myntri ka tnat ka koit ka khiah kala pan por, ki ASHA ruh kin ap iaka Sorkar ban pynbeit, kumno ban pyntreikam iaka Community Base Health Incentives bad hadien kane ngin sa lah ban rai, la ngi hun ne em iaka jingkyntiew T. 1000 ka bai nong” ong ka Kong Mirajune.
