Shillong, Jymmang 28: U Myntri Rangbah ka Jylla Conrad K Sangma ha ka sngi Balang ula ong ba ka sorkar kala pynsangeh lut ia baroh ki jingthmu kiba thymmai ban leit shabar ri bad ula pynsangeh noh ruh ia ki jingthmu ki jongu ban leit bar ri da kaba iaid kat kum ka jingbthah u Myntri Rangbahduh ka ri Narendra Modi ban pynduna katba lah ia ka jingpynlut pisa.
Haba kren halor ka jingsngewkhia ha kaba iadei bad ki jingleit bar ri kaba iadei bad ki kam sorkar wat hapdeng ka jingkyrpad u Myntri Rangabhduh ka ri, u Conrad Sangma ula pynshai ba dei tang ki prokram kiba la dep ban mynjur ha ki bnai kiba la dep bad ai jingmynjur da ka Sorkar Pdeng kadei kaba la shah ban iaid shakhmat.
“Ki prokram kiba la ioh ia ka jingmynjur ne Political Clearance bad la ioh ruh ia ka jingbit ha kaba iadei bad ka jinglut jingsep hashwa ban pynbna u Myntri Rangbahduh ka ri, kidei kiba la iaid shakhmat, namar ba kitei ki jingleit ki shim por haduh 3 ne 4 bnai bad teng teng haduh 6 bnai na ka bynta ka jingpynkhreh” ula ong ia ki nongthoh khubor.
Ula ong ba ka kynhun kala leit shabar ri kadei kaba la pyndep ia baroh ki jingdonkam. “Kidei kiba la dep ban don lypa. Ia ki kam ki jam baroh lah pyndep, la dep ban bat (Book), la mang na ka bynta ka jinglut jingsep bad la ioh ia ka Political Clearance na ka Sorkar Pdeng ruh” la ong u Sangma.
Hadien ba u Myntri Rangbahduh ka ri ula ai ia ka jingpynbna, ka jylla kam shim la ai shuh ia kino kino ki jingbit ia ki jingtyrwa kiba thymmai.
“Hadien ba la wan ka jingpynbna na u Myntri Rangbahduh ka ri, kino kino ki jingtyrwa kiba thymmai ban leit shabar ri kidei kiba ym shim la pdiang shuh” ula ong.
U Sangma ula ong, ba ula shim ia ka rai kaba skhem halor kane ka mat khlem da pynmih wat ia kano kano ka jingpynbna paitbah.
“Nga shimet hi nalade, nga lah pynsangeh noh wat ia kano kano ka jingleit shabar ri. Nga long uba shai kdar ba ngi dei ban iaid katkum ki jingbthah jong u Myntri Rangbahduh ka ri namar ba kane ka long na ka bynta ka bha ka miat kaba iar jongka ri” ula ong. “Nga lah pynsangeh lut ia baroh ki jingthmu ban leit shabar ri hadien ba kala mih ka jingpynbna na u Myntri Rangbahduh ka ri”.
Ula bynrap ba ki jingleit bar ri kiba dep ban ioh jingbit naduh kham hashwa kidei kiba la shah ban iaid shakhmat namar ba ia ki kam ki jam baroh kidei kiba lah dep ban pyndep lut.
“Kito kiba kham hashwa kiba la ioh jingbit, kumta tang kitei hi kidei kiba la iaid shakhmat. Hynrei hadien jong ka jingpynbna, kino kino ki jingtyrwa kiba thymmai na ka bynta kano kano ka jingliet shabar ri kidei kiba la pynsangeh lut”.
Haba batai ia ka rukom pynkhreh ia ki jingleit kiba kham hashwa, u Conrad Sangma ula ong, ba kidei kiba iaid beit katkum ki jingbthah u Myntri Rangbahduh ka ri. “Kidei kiba la pynkhreh naduh ki 3 bnai kiba la leit, 5 bnai shwa ba u Myntri Rangbahduh ka ri yn ai ia ka jingpynbna”.
Lah dep ban bat (Booking) lypa ia kiei kiei, la shim ia ka Political Clearance na ka Sorkar India bad ia ki jingdonkam kiba kongsan kidei kiba la dep ban pynkhreh bad pynbit pynbiang bad ki tnad kiba dei khmih” ula ong.
“Hadien ba ula ai ia ka jingpynbna bad ong ia ki Jylla ba kim dei ban phah ia ka kynhun, ngim shim la ai jingbit shuh. Nga lah ioh pdiang kumba 7 ne 8 tylli ki jingtyrwa kiba thymmai bad ia kitei baroh kidei kiba la pynsangeh noh shwa” ong u Myntri Rangbah.
