Shillong, Nohprah 04 : U Myntri Rangbah ka Jylla Conrad K Sangma ha ka sngi Nyngkong, ula pyntip ba ka Sorkar Pdeng kala pynsangeh ban pyntreikam ia ka Members of Parliament Local Area Development Scheme (MPLADS) ym tang ia ka Tura Parliamentary constituency hynrei ha baroh kawei ka Ri naduh ka por jong ka Covid.
Haba iakren bad ki nongthoh khubor, u Conrad ula ong “Ha baroh kawei ka Ri ha ka por ba lynshop ka Covid, ka Sorkar India kala pynsangeh ia ka jingtreikam ka MPLAD scheme. Kumta, kam dei satia tang ha Tura hynrei ha baroh kawei ka Ri ba ka MP skhim ka khlem treikam shuh bad ia kane la leh da ka Sorkar NDA ba ialam ka BJP bad namar kata, phi lah ban kylli ia u President ka BJP halor kane bad nga tip ba u tip bha”.
U President ka Meghalaya BJP Rikman G Momin ula kynnoh ba ka MP ka Tura Agatha K Sangma kam shym la lah ban pyntreikam ia ka MP skhim ha Ri-lum Garo.
U Myntri Rangbah ula kam ba ka MP ka Tura kala shim ia ka bynta kaba khraw bha haba iadei bad ka jingpyntreikam ia ki skhim ba Sorkar Pdeng ha Jylla.
“Nalor ka MP skhim phi dei ban sngewthuh ba ka kamram jong ka MP ka long ruh ban khmih ia bun ki skhim ka Sorkar Pdeng. Mynta ka ka MP jong ngi kala shim ia ka bynta kaba khraw bha la ka dei ha ka jingpyntreikam ia ka PMGSY, ka dei da ka jingai jingmut jong ka bad jingbuddien ba kane ka prokram bad ka skhim kala jam shakhmat bad dei ruh ia ka jingpeit pyrman jong nga ba ki kam kila iaid shaid shaid” ong u Conrad.
“Kala leh iashibun kiei kiei halor ki prokam bapher bapher bad ha ka Jal Jeevan ruh baroh ki jingkyrshan ba ngi ioh n aka Sorkar Pdeng khamtam ha Ri-lum Garo kala wan na ka MP khamtam haba ngi donkam ban leit iakren ia ki Myntri Sorkar ne ka Sorkar ban pan jingiarap” ula ong.
