Nongpoh, Jymmang 29 : Ka Khasi Students’ Union (KSU)-Nongpoh Circle, hynne ka sngi Nyngkong, kala leit ban pynsangeh ia ka interview thungkam kong ka Ophis u District Medical Health Officer, Nongpoh halor ka jingujor ki samla wad kam ba kynnoh, ba kam don satia ka jingpyniaid ryntih ha kane ka rukom khot interview.
Ki kam kiba la khot pynlong interview ki kynthup ia kawei ka kam Storekeeper District Warehouse bad hynriew tylli ki kam Staff Nurse.
Kane ka jingleit tuklar ka KSU kala mih hadien ka jingioh pdiang ia ka jingujor na ki katto katne ki samla ba aplai ia kitei ki kam, kiba la pynpaw ia ka jingbym sngewhun ia ka rukom pynmih ia ki kyrteng kiba lah ban leit interview, kaba long tang 2 ngut ha ka kam Store Keepr bad 5 ngut ha ka kam Staff Nurse.
Haba iakren bad kawei na ki samla ba aplai kam, kala pynpaw ia ka jingsngew lyngngoh ban iohi ia ki kyrteng jong ki samla kiba lah ban ai interview ha kane ka sngi. Kala kynnoh ruh ba kam shym la don satia kano kano ka jingpyntip sha ki nongthep kam ia kane ka jingpynmih kyrteng.
Kane ka samla kala iathuh ba ha ka jingpynbna paidbah ia ka jinglait kine ki kam, la kynnoh ba ka Ophis u DMHO kala pan ia ka jingnang jingtip ban trei (experience) ba 3 snem ha ka Covid-19. “Kumno ngin lah ban pynbiang haduh 3 snem haba ka khlam Covid-19 ka neh tang 2 snem duna” kala ong.
U President ka KSU-Nongpoh samla John Lyngdoh ula ong ba ka Seng kam banse ban tuklar ia kane ka rukom thungkam namar ka rukom pyniaid jong ka Ophis u DMHO ia kane ka kam, kam long satia kaba iaid ryntih khamtam halor ka jingpynmih lypa ia ki kyrteng tang jong ki nongaplai kam kiba lah ban shim interview.
Une u Nongialam ka KSU ula iathuh ba ka seng kala iakynduh ia ki bor ba pyniaid ia ka interview bad la bthah ban pynsangeh shuwa ia kane ka interview katba ym pat lah ban pynbeit ryntih ia ka kam.
