Pynsangeh ka KSU ia ka jingiakhih ha NEIGRIHMS hadien ba tuklar ka Sorkar Jylla

Shillong, Jymmang 05: Ka Khasi Students’ Union (KSU) hynne ka janmiet sngi Nyngkong, ka la rai ban pynsangeh shwa shipor ïa ka jingïashong kyllain mungor ba khlem pud sng, ba la pynlong hakhmat ka Administrative Block jong ka North Eastern Indira Gandhi Regional Institute of Health and Medical Sciences (NEIGRIHMS).

Kane ka wan hadien ka jingtuklar jong ka Sorkar Jylla bad ka rai NEIGRIHMS ban pynsangeh noh shwa ïa ka jingthung kam hapoh ka Institute tad haduh ban da pynbeit ïa ki mat kiba ïadei bad ki jingdawa jong ka KSU.

Lah ban kdew ba ki dkhot ka KSU kila pynlong ia ka jingiakhih daka ba shong kyllain mungor hakhmat ka Administrative Block jong ka NEIGRIHMS naduh 1 tarik Jymmang.

Haba kren sha ki nongthoh khubor hadien ka jingïalang ba la pynïaid da u Myntri Sorkar u Bah Paul Lyngdoh ha ka jingïadonlang ki ophisar ka NEIGRIHMS bad ki nongïalam ka KSU, u Chairman ka Employment Cell ka KSU samla Reuben Najiar u la ong, “Ngi la rai ban pynsangeh shwa shipor ïa ka jingïakhih jong ngi namar ba ngi hap ban bishar ïa ki katto katne ki kot ki sla ba donkam halor ki mat jingdawa. Kam long kaba iahap ia ngi ba don hangne namar ka kam ka dang iaid ban bishar bniah”.

“Hynrei ka jingiakhih jong ngi kan sdang biang lada ka NEIGRIHMS kam lah ban pynurlong ia ki jingdawa ha ki sngi ban wan” maham u samla Reuben.

U samla Reuben u la ong ba ym shym la lah ban iakren pynbeit lut ia ki mat ha ka jingialang bad khlieh da u Myntri Sorkar namar ki don ki mat kiba lah ban pynbeit da ka NEIGRIHMS bad ki don katto katne ki mat ki ba hap shim khia da Governing Council bad ka Tnat Ministry of Health & Family Welfare ka Sorkar Pdeng khamtam haba ïadei bad ka jingbhah kyrpang naka bynta ki kyrtong ST nalor kiwei kiwei ki mat.

“Halor kane ka NEIGRIHMS ka la khot ia ki Nongialam ka KSU ban iakren pynbeit naduh ka 6 tarik Jymmang bad ngin sa peit ia ka Roster Register namar ngi la kdew ba ki don shibun ki jingbym shai” u la bynrap.

U samla Reuben u la pyntip ba ka KSU ka la rah ïa ka mat jong ka rta thepkam hapoh Hospital bad u la ong “Ka jingpynhiar kynsan ïa ka rta na ka 35 sha ka 30 snem kan wanrah ïa ka jingeh kaba khraw ïa ki kyrtong namar ba kin ym lah ban thepkam ïa kum kine ki kam bad ha ki snem ba la dep, kiba bun ki kyrtong, kim shym la lah ban thep namar ka jingpang Covid bad kumjuh ruh ki kam ba thylli haki Ophis Sorkar Pdeng ki wan shisien haka 3-4 snem. Namar kata ka jingpynrit iaka rta kan khanglad iaki samla ba dei hok ban ioh kam ban ioh thepkam hapoh kane ka Hospital”.

“Haba iadei bad ka jingbhah kyrpang 80:20 ki kynthei bad shynrang naka bynta ka kam Nurse, ha kaba sdang ka NEIGRIHMS ka la pynpaw ba ka dei ka rai jong ka Ministry hynrei ka la pynpaw ba ka NEIGRIHMS ka don la ka jong ka Governing Council haka jingdon lang ki dkhot naka Sorkar Pdeng. Namar kata ka Governing Council ka lah ban shim ia ka rai ban pynbeit ia kane ka jingeh” la ong u samla Reuben.

U Chairman ia Employment Cell KSU u la ong “Kiwei ki mat baka KSU ka dawa kadei ban don daka jaka thoh eksamin centre. Watla ka NEIGRIHMS ka don ha Meghalaya hynrei ki samla jong ka Jylla ki hap ban leit thoh ia ki eksamin jong ngi ha Guwahati, Delhi bad kiwei kiwei ki jylla. Kane ka long ka jingeh khamtam ia ki samla kiba wan na ki longiing kiba kham duna ka ioh ka kot. Kane kan long kum mawjynthut ia kum kita ki samla ban leit thoh iaki eksamin shabar ka Jylla. Ka seng ka sngewthuh ba ka Jylla Meghalaya kam don ia iaki kor Computer ban pynlong eksamin hynrei ngi la ai jingmut ba iaki eksamin dei ban pynlong Offline kumba la pynlong haki snem ba la dep kynthup ha u snem 2019.

Ngi sngewthuh ba ka eksamin kaba pyndonkam da ki kor Computer ka long kaba khuid bad suba hynrei tad haduh baka Meghalaya ka la biang lut iaki kor Computer, ngim lah ban pdiang iaki eksamin ki ba buh jingeh iaki samla kiba wad kam”.