Shillong, Jylliew 12 : Ka Iingkashari Meghalaya High Court, ha ka sngi Palei, kala pynsangeh ia ka hukum jong ka Executive Committee ba ialam da ka VPP ha Khasi Hills Autonomous District Council, ba pynhiar kyrdan biang ia u nongtrei bala dep thung kam pura (Permanent) sha ka kam nongtrei Casual.
Kane ka hukum kala mih na ka Iingkashari u Justice B Bhattacharjee haba bishar ia ka aplikeshon bala mudui da u Bah Banrikupar Suting pyrshah ia ka KHADC lem bad ia arngut kiwei pat.
Ha ka aplikeshon, une u nongmudui (Banrikupar) ula kyrpad ia ka Iingkashari ba kan pynsangeh noh shuwa ia ka jingtreikam ka Office Order No.357 ba pynmih ha ka 30/05.2025 da ka KHADC, ha kaba ia ka jingthungkam pura jong u nongmudui kum u Enforccement Constable la pynduh pyndam noh bad la thung biang ia u kum u Casual Enforcement Constable.
“La paw na ki jingiasaid bad na ki kot ki sla ba une u nongmudui ula shah thung kum u nongtrei casual lyngba ka Office Order No. 528 ‘B’ ba 01.06.2019. Hadien ba pyndep ia ka jingshakri ba 5 snem kum u casual Enforcement Constable, lyngba ka Office Order No.585 ba 14.08.2024, la thungkam pura noh ia u kum u Enforcement Constable halor ka rai bala shim da ka Executive Committee ka KHADC” ong ka hukum.
“Hynrei, da ka Office Order No.357 ba pynmih ha ka 30.05.2025, ka jingthungkam ia une u nongmudui kum u Process Server la pynduh pyndam noh bad la pynphai ne pynhiar kyrdan biang ia u sha ka kam casual kum u Enforcement Constable”, ong ka hukum haba kdew ba kane ka Office Order kam shym la pyni ne kdew ba une u nongmudui ula ioh pdiang ia ka notice lane ai ia ka lad ban bishar hashuwa ka jingshim rai ban pynduh noh ia ka jingthungkam pura kum u Process Server.
Ka Iingkashari kala ong ba watla ha kane ka Office Order, la kdew ba ka jingthungkam pura ia ka jingshakri jong une u nongmudui ka long shabar ka rule kaba treikam kum ka dak ka jingpyn kylla ia ka hukum thungkam pura, hynrei ym (order) shym la batai ne pynpaw ia ka bynta jong ka rule ka bym shym la bud haba thungkam pura ia ka jingshakri jong u.
“Namar kine kiei kiei, ia mynta, la sngew iahap ban pynsangeh shuwa shipor ia ka jingtreikam jong ka Office Order No. 357 ba pynmih ha ka 30.05.2025 tad haduh ka sngi ba shong bishar biang” ong ka Iingkashari.
“Buh ia kane ka kam ha ryngkat bad ka mukotduma writ petition ba pura” kala bynrap.
Lah ban kdew hangne, haduh 30 ngut ki nongtrei bala thungkam pura kila shah pynhiar kyrdan biang sha ka kam casual kat kum ka Office Order ka KHADC. Nalor kine ki don haduh 13 ngut kiba la shah beh syndon na ka kam.
Haduh 27 ngut na kine ki nongtrei kila leit mudui da ka writ petition ha Iingkashari pyrshah ia ka hukum jong ka KHADC.
 sha ka kam nongtrei Casual.){kind=link}