Shillong, August 14: Ka Hindu Society ba kyrteng ka Yatra, ha ka sngi Balang kala pyntip ha ka Iingkashari Meghalaya High Court ba kala pynsangeh noh ia ka jingthmu ban pynlong ia ka Yatra sha ka Krem Mawjymbuin kaba don ha Mawsynram.
Kane ka rai kala mih hadien ba ka Dorbar Shnong Mawsynram kala khang pyrshah ban pynlong ia kano kano ka jinglehniam ha katei ka krem kaba dei ka jaka jngohkai.
Ka Hindu society kala rai ban pynlong ia ka Yatra ne jingiaid pilkrim ha ka 10 bad 11 tarik mynta u bnai sha katei ka krem kaba don ia u maw uba iasyriem bad u ‘Shiva Ling’.
Hynrei ka Dorbar Shnong Mawsynram kam shym la ai ia ka No Objection Certificate (NOC) halor ka nongrim ba kane ka krem ka kadei ka jaka jngohkai pyrthei.
Hadien katei ka jingpynbna jong ka Dorbar Shnongkana ka liang ka Hindu Society kala leit ujor da ka mukotduma ha ka iingkashari Meghalaya High Court.
Ha ka 9 tarik u Nailar, ka iingkashari kala tian bishar ia ka mukotduma bad kala bthah ia ka Dorbar Shnong ba kan pynbeit ia katei ka kam da kaba iakren da ka jingiasngewthuh jingmut bad kala buh tarik ban shong bishar biang ia ka mukotduma ha ka 14 tarik u Nailar.
Hynrei ha ka sngi Balang kane ka Hindu Society kala pyntip hapoh ka iingkashari ba kala pynsangeh noh ia ka Yatra ka jongka.
U Assistant Rangbah Shnong ka Mawsynram u Bah Hiamdor Rapsang ula ong ba ka krem Mawjymbuiñ ka dei ka jaka jngohkai bad ka Dorbar Shnong ka don ia ka bor ban ban pyntreikam ia ki ain bad ki kanun shnong ha ka jingpyndonkam ia katei ka Krem.
U Bah Rapsang ula pynpaw ia ka jingsngewtynnad ba ka Society kala pynsangeh noh ia ka jingthmu ban pynlong ia ka Yatra.
Katba u Bah VGK Kynta u Nongiasaid ain̈ ka Shnong Mawsynram, ula ong ba ka Yatra Society kala pyntip ha ka iingkashari ba kala pynsangeh noh ia jingthmu ban pynlong ia ka Yarta hynrei kam shym la weng noh pat ia ka jingujor ne Petition hapoh ka iingkashari.
U Bah Kynta ula iathuh ruh ba ka iingkashari kala pdiang ia ka jingtyrwa ban thaw ia ka committee kaban peit bad kyntiew ia ka krem Mawjymbuin kum ka jaka jngohkai ka ban khring ia ki nongjngohkai bad ia ka khuid ka suba jong katei ka jaka.
Ka jingkhang pyrshah ka Dorbar Shnong ban pynlong ia kano kano ka jinglehniam ha ka Krem Mawjymbuin̈ kala khring wat ia kawei ka kynhun niam Hindu na Assam bad kane ka kynhun ha ka 6 tarik u Nailar kala byrngem ban khang ia ki surok kiban leit sha Meghalaya lada ka dorbar shnong Mawsynram kam weng noh ia ka jingpynbna ban khang pyrshah ia ka jingiaid pilkrim sha ka krem Mawjymbuin kaba jngai kumba 60 km na ka nongbah Shillong.
