Shillong, Nailur 27 : Ka seng Federation of Khasi Jaintia and Garo People (FKJGP) hynne ka sngi ba-ar kala leit pynsangeh iaka eksam thungkam jong ka skul Laitumkhrah Assamese Secondary School namar ka jingshem ba kane ka skul kala niew bein ia kawei ka samla Khasi kaba dei ban ioh ia ka kam kum ka Assistant Teacher ha ka sobjek English.
Ki Nongialam ka FKJGP hapoh ka jingialam u Education Secretary Bah Khrawkupar Nongsiej, kila iakynduh ruh ia ki bor pyniaid jong kane ka skul bad pan jingpynshai halor ka nongrim ba khlem thungkam ia ka samla Khasi kaba la pass ia ka eksamin iohkam nonghikai.
“Ka daw kaba la pynlong ia ngi ban leit khang ia ka eksamin, kadei namar ba ia kane ka eksamin la dep ban pynlong ha u snem 2018 bad kawei ka samla Khasi kala wan shakhmat bad kala dei hok ban ioh ia katei ka kam hikai” ong u Bah Khraw haba iakren bad ki nongthoh khubor
“Hynrei ki bor pyniaid ka skul kim shym la thungkam satia iakane ka samla watla kala wan shakhmat eh, bad kim shym la ai jingtip eiei bad mynta kila pynlong biang iaka jingthoh eksam. Kane ka long ka bym iahap satia ban pynduh iaka hok jong katei ka samla Khasi” ong u Bah Khraw
Ha ka jingiakynduh bad ka Principal ka Skul ka P Devi, ka FKJGP kala pan jingpynshai balei ba ka skul kam thungkam ia kane ka samla Khasi kaba wan hakhmat eh na baroh kiba ialeh ia ka eksam bad balei ruh ba kam shym la pynbna ia ka result jong ka interview nalor ka daw ba ka skul ka pynlong biang ia ka eksamin.
Halor kane, une u Nongialam ka FKJGP ula iathuh “Ka Principal kala pyntip ba dei ka Managing Committee (MC) kaba bthah ban nym pynbna ia ka result”.
“Ngi la wad jingtip shaphang kane ka MC bad ngi la shem ba baroh ki dkhot ki dei ki Assamese lait noh iwei I Longkmie Khasi iba mihkhmat ia ki Kmie Kpa ban long I dkhot ha ka MC” ula ong haba byrngem “Lada kane ka skul ka leh kumne bad ka pynmih ia ka jingsngewpher jaidbynriew hapoh ka jylla jong ngi, nga tharai ngi hap ban leh eiei”.
Une u Nongialam ka FKJGP u pyntip ruh ba wat ka ophis jong ka Director of School Education & Literacy (DSEL) kala phah daka jingthoh sha ka Ophis ka District School Education Officer (DSEO) ban bthah ia kane ka skul ba kan thung ia katei ka samla Khasi kum ka Assistant Teacher khnang ba kan ym mih kano kano ka kyntum kynram hadien habud.
“Kaba lyngngoh ka long ba katei ka skul wat haba kala ioh iaka jingbthah naka DSEO ruh kam shim la burom satia ban thungkam ia katei ka samla Khasi hynrei kala khot pynlong biang iaka eksam bad Interview kam” ula ong.
U Bah Khrawkupar u pyntip ba ka FKJGP kan sa leit iakynduh ia ka DSEO jong ka East Khasi Hills bad kumjuh ruh ia u Myntri ka Tnad Pule Puthi ban pynioh ia ka hok jong katei ka samla Khasi kaba dei ban ioh ia ka kam hikai ha Laitumkhrah Assamese Secondary School.
