Shillong, Naiwieng 09: Ha ka sien kaba nyngkong eh, ka Meghalaya Lawn Bowling Association of Meghalaya, kala ioh pynrung ia u samla Khrawbok Tongper, kum u Technical Official jong ka Bowling Federation of India ha ka 37 National Games 2023 kaba la long ha Goa naduh ka 29 tarik Risaw haduh ka 8 tarik Naiwieng 2023.
Katkum ka kyrwoh na ka President ka MLBA Kong VN Lamare bad ka Kong R Swett, General Secretary ka MLBA, kila pyntip ba u Khrawbok Tongper, ula ioh rung teng kum u nongialehkai ha ryngkat kiwei pat na ka jylla Meghalaya ban iashimbynta ha ka 8th National Lawn Bowls Championship 2023 kaba la long naduh 21 haduh 30 tarik Nailur 2023 ha Guwahati.
Kila ong, kum shi bynta ban nang kyntiew iaka jingialehkai Lawn Bowling hapoh Meghalaya, ka synjuk kala ioh ban phah ia u Khrawbok kum u Technical Official ha ka Lawn Bowling ha ka 37th National Games kaba la long ha Goa bad da kane ka jingiohlad jong u samla Khrawbok, la khmih lynti ba kane ka jingialehkai kan iohlad ban nang paw hapoh ka jylla.
Ka Meghalaya Lawn Bowling Association ka ai khublei kyrpang ia u General Secretary bad President jong ka Meghalaya State Olympic Association (MSOA) ia ka jingai mynsiem bad ka jingiarap ban ioh phah ia uwei u Samla Rangbah na ka jylla kum u Technical Official.
Kila pynpaw ruh iaka jingkyrmen ba nangne shakhmat, ka tnad sorkar kin ai mynsiem bad kan kyrshan lem ia ka MLBA ba kan ioh ban pynlong ia ki tournament, ki championships bapher bapher hapoh jylla khamtam ba kane ka jingialehkai ka long kawei na ki jingialehkai kaba ka jylla Meghalaya kan hap pynkhreh na ka bynta ka 39 National Games hapoh jylla Meghalaya ha u snem 2025 lane 2026.
