Jowai, Naitung 07 : U Waheh Shnong ka Lapangap Bah Deimonmi Lyngdoh hynne ka sngi Nyngkong ula pynrem jur ia ka jingkam jong uwei u Nongshongshnong ba u shah thombor ha ki paid Karbi dang shen haba pyntip ba kane ka dei tang ka kam thok kam shukor bad ka shnong kam shim satia ia ka jingkitkhlieh halor ki kam shukor jongu.
U Waheh Shnong ula ong ba une u Nongshong shnong ka Lapangap ba kyrteng u Linus Joit, ula kam ba ula shah thombor bad shah siat da ka jri ha ki paid Karbi kiba na ka shnong Lakaroi katba u dang wan shim dawai niangsohpet ia ki khun na Lu,lakhiat.
U Bah Linus Joit ha ka video ba ula pynphriang, ula kam ba ula shah thombor ha ki 50 ngut ki briew kiba dei ki Karbi na jylla Assam, kiba la siat ia u da ka jri katba u dang leitphai sha la iing da ka saikil na shnong Lumlakhiat ban leit thied ia ki dawai kynbat.
U Bah Deimonmi Lyngdoh ula ong ba utei u briew ula shu kam ia kane ka jingjia bad ha ka jingtohkit la lap ba ka jingmyn saw jong u ka dei namar ka jinghap na ka saikil ba u shong. U iathuh b aka Shnong lem bad ki Pulit kila shimkhia ban tohkit ia kane ka jingkam jong u, bad dei ha kane ka jingtohkit ba ula phla ba u shu thok bad shukor.
U Waheh Shnong ula pynrem jur ia u Linus Joit bad ong ba kum kane ka rukom thok kan ktah jur ia ka shongsuk shongsain ha katei ka thain kaba la don lypa ia ka jingiakajia pud.
U Bah Lyngdoh ula iengskhem ruh ia ka jingdonkam ban buh ia ki pulit SF-10 ha ka por ba leit ban bet bad ban ot ia ki marrep ban iada ia ka hok, jingim bad ia ka kamai jakpoh jong ki paidbah ka shnong Lapangap.
