Shillong, Iaiong 27: Ki nongshong shnong na ka thaiñ Nartiang, East Jaintia Hills hynne ka sngi Saitjaiñ, kila dawa na ki bor ka aiñ ban thwet bad ban pynshitom ia ki briew ba kawang Petrol Bomb iaka iingsah jongu Symbud Myntri Rangbah ka Jylla u Bah Sniawbhalang Dhar.
Haba kren sha ki lad pathai khubor u Bah Mutshwa Thabah uba dei ruh u Rangbah Shnong ka shong Sohphoh ula ong “Kum ki nongialam na ka thaiñ Nartiang, ngi pyrshah jur ia ki riewshim kabu kiba la kawang Petrol Bomb iaka iingsah u Symbud Myntri Rangbah ka Jylla u Bah Sniawbhalang Dhar”.
U Bah Mutshwa ula ong, ba kum ki nongshong shnong ki dap jingsngewsih ba khraw namar lada ki riewshim kabu kila nud ban thombor ia ka iingsah u nongmihkhmat, kane kan pynshong syier ia ka jylla baroh kawei.
Ula ong “Kum ki nongshong shnong ka Constituency ngi sngewrem halor kane ka jingthombor ki runar iaka iingsah u nongmihkhmat ha kaba ula mihkhmat haduh 4 sien ia ka Nartiang constituency”.
Nalor kane, ula ong ba kane ka jingleh ki runnar kadei tang ka jingniewbeiñ namar kat ia u nongmihkhmat uba la khmih bad la peit iaka shnong un ngat ha kum kane ka jingjia.
“Ngi kyntu iaki bor jong ka aiñ ban leh iaka ba donkam ban thwet iaki ba donkti bad ban pynshitom katkum ka ain” ula ong.
