Shillong, Risaw 28: Ka TUR bad KAM Meghalaya ka pynrem jur ia ki kam shoh briew bad pynkulmar kaba la jia mynta ka sngi ha ki surok jong ka thaiñ Laitumkhrah ter ter da ki riew shong shit kiba iashim bynta ha ka jingiaid paidbah na ka bynta ka iohkam iohjam kaba la pynlong ha Madan Iewrynghep, Laitumkhrah Shillong.
Ka kyrwoh naja TUR ka pynpaw ba ka jingpynkulmar bad jingshoh briew da ki nongiaid paidbah ka long kaba ym lah ban pdiang satia bad kaba la buh ia ki nongiaid lynti khamtam ki Kynthei khynnah ha ka jingma bad jingsyier kaba khraw.
“Kaba lyngngoh shuh shuh ka long ba ym don ki bor pahara pulit kiba synran ia ki nongiaid paidbah bad kane ka jingkheiñ sting jong ki bor district bad tnat pulit ka long ka jingleh bymsuidñiew bad jingbym kheiñ snep ia ki nongshong shnong bad dei namar kane ka TUR bad ka KAM Meghalaya ki pynrem jur ia ka jingkheiñ sting jong ki bor ka Aiñ bad dei ban pynshitom jur ia ki ophisar pulit bad majistior kiba dei ban peit ia kane ka jingiaid paidbah” la ong ka kyrwoh.
Ka kyrwoh ka pynpaw ba ka jingjia mynta ka sngi ka i kumba ka sorkar ka ia don bynta lang bad thmu khnang ban pynmih ia ki jingkulmar bad kane ka lah ban dei ka buit election jong ki seng saiñ hima kiba don ha ka sorkar bad bym dei sorkar ban pyntieng pynsmiej ia ki briew.
Kane ka Sorkar kaba lamkhmat da ka NPP, UDP, PDF, HSPDP, BJP bad ki Independent ka lah pheil ha baroh ki liang bad kane ka jingkulmar ka lah ban long ba ki thaw khnang ban pynklet ia ka jingbymler kam bad jingbam sap jong ki.
Sa shisien ka TUR bad KAM Meghalaya, ki pynrem jur ia ka Sorkar MDA bad ka kyntu ruh ia ka ïngshari ban buh jingkylli ia ka sorkar halor ka jing bym lah teh lakam ia kine ki kam pynmynsaw bad pynkhreh lypa na ka bynta kane ka jingiaid paidbah.
