Shillong Naiwieng 29: Ka Shillong Press Club hynne ka Sngi Thohdieng kala pynrem jur halor ka jingshah pynjulor ka kali bad shah tuh ki tiar ki tar jong uwei u nongpathai khubor ka jylla Bah Martin Nongkhlaw kaba la jia dang shen hakhmat jong ka Shillong Press Club.
Katkum ka kyrwoh na u President ka SPC Bah Deimaia L Siangshai bad u General Secretary Bah Dominic Savio Diengdoh, ka SPC kala pynrem jur ia katei ka jingjia ia u nongpathai khubor bad kila pynpaw ia ka jingsngewkhia halor ka jingshngain bad jingiada ia ki nongshong shnong.
“Ka Shillong Press Club ka pynrem jur ia katei ka jingjia bad ka kyntu ia ki bor pulit ba kin pynsted ia ki kam tohkit ban pynthikna ba kiba leh ia ka kam sniew ki dei ban shah pynngat ha ki kyndon aiñ” pynpaw ki nongialam ka SPC.
Kila pynpaw ruh ba ki jingjia khah khah jong ki kam tuh kam thiem ha ka nongbah kila buh ha ka jingma ia baroh ki nongshong shnong ha kaba wat ki jaka sah jong ki riewshimet bad ki iingmane kim long shuh kiba shngain namar ba ki runar kila leit prong jubor bad ban tuh ban thiem.
“Ka long kaei kaei kaba sngewkhia ia ka jylla bad ia kum kine ki jingjia kidei kiba la ujor man la ka sngi” kila pynpaw.
“Ngi kyntu ia ka sorkar ba kadei ban pynkhreh ia ka rukom treikam ne ka ‘Plan of Action’ ban wanrah biang ia ka jingshngain bad jingiada ia ki nongshong shnong jong ka jylla” bynrap ka SPC.
