Nongpoh, Naiwieng 16: Ka Ri Bhoi Youth Federation (RBYF), mynta ka sngi ka la pynpaw ia ka jingsngewkhia kaba jur halor ka jingdonkti jong ka tnad Forest ka Ri Bhoi District ban aiti ia kawei ka khlaw kaba don ha ka shnong Mawkynrong ha ka thain Mawhati sha u riew shimet u ba la pom pathar ia ki palat 8 hajar tylli ki tynrai dieng kaba la long kum ka jingpynjot pathar ia ka mei mariang.
Haba ka kyrwoh ba la phah da u Bah Reynold Dkhar, President ka RBYF, Mawhati Circle, mynta ka sngi ka la pynrem jur ia ka tnad Forest jong ka jylla Meghalaya kaba la shu aiti ia katei ka khlaw ha Mawkynrong kaba don kumba 15 hajar tylli ki tynrai sha u riew shimet ba la shimti da ka Dhar Kompani bad kane ka kompani ka la pom pathar khlem pyrkhat ia ka mei mariang la palat 8 hajar tylli ki tynrai dieng.
U la iathuh ruh, ba ka seng ka dap da ka jinglyngngoh kaba khraw ba kumno ba kat ka tnad Forest kaba don ka jingkitkhlieh ban iada ia ka mariang hynrei hangne la paw shai pynban ia ka jingleh dusmon jong kane ka tnad treikam sorkar da kaba aiti ia kane ka khlaw sha u riew shimet ban pynjot pynpra ia ka bad kaba la ktah ruh ia ka jingtyrkhong bad ka jingduh jong ki tyllong umbam umdih ha kane ka thain.
“Ngi la ioh jingtip ba don ruh ki shnong kiba iada ia kane ka jingpom ia ki dieng ha katei ka khlaw, hynrei ka seng hi kam kynnoh ia ki paidbah hynrei ka jingkitkhlieh hi ka dei jong ka tnad Forest bad ka seng hi kan wad lut ia ki jingtip baroh hashwa ban shim da ki lad kiba tyngeh da kaba pynlong ruh ia ka jingiakhih lada ka tnad Forest kam lah ban pynshai paidbah halor ka jingaiti ia kane ka khlaw”, ong u Bah Dkhar.
Shuh shuh ruh, na ka liang ka RBYF ka la dawa na ka tnad Forest ba kan pynshai paidbah halor kane ka jingaiti ia kane ka khlaw sha u riew shimet hapoh hapoh shisngi arsngi ban pynshai ia ki lynti ne kyndon jong kane ka tnad ba ka la nud ban aiti ia kane khlaw bad ka jingpom ia ki 8 hajar tylli ki tynrai dieng bad lada kane ka tnad kam lah ban pynshai na ka liang ka seng kam banse ban ujor sha ki bor ka ain bad wat ban pynsngew sha ka Iingkashari halor kane ka kam pynjot mei mariang.
