Dei ka kput ba ujor ejahar u Secretary ia u nongkhaii droks
Shillong Nailur 01: Ka Dorbar Shnong Nongsohphoh, Upper Mawprem, kala pynrem jur ia ka jingujor ejahar kawei ka longkmie pyrshah ia u Secretary ka Shnong Bah Hardy Ryntathiang ba u jrong kti bad ong kane ka dei tang ka jingkynnoh ka bym shisha bad ka bym don nongrim.
Ka Dorbar Shnong Nongshohphoh kala lum ia ka jingialang kaba kyrkieh ha ka sngi Saitjain ha ka ïingdorbar ia kaba la wan ban iashimbynta da ki nongialam jongka Seng Kynthei bad Seng Samla Shnong bad kane ka jingialang kala pynrem jur ia ka jingujor ejahar pyrshah ia u Secretary Shnong da kawei ka longkmie hapoh ka Lumdiengjri Police Station ha ka 21 tarik u Nailar 2024 da kaba shu kynnoh thok ba kala shah kti.
Katkum ka kyrwoh na u Rangbah Shnong, President ka Seng Kynthei bad Seng Samla Shnong Nongsohphoh, kila pynpaw ba u Secretary udei uba la shah jied haki nongshong shnong bad uba la ioh ia ka jingithuh na u Syiem ka Hima Mylliem bad ka Khasi Hills Autonomous District Council (KHADC) na ka bynta ban pyniaid ia ki kam shnong kam thaw bad ban pynneh ia ka shongsuk shongsaiñ ha ka shnong bad kumjuh halor ki kam kiba iadei bad ki bor sorkar, ki pulit bad kiwei kiwei.
“Katei ka ejahar ka thew tang ia u Secretary marwei, hynrei la shim ba ka dei ka jingthombor ia ka Dorbar Shnong Nongsohphoh, Upper Mawprem baroh kawei” la pynpaw ki nongialam shnong.
“Ka jingujor ejahar kam don eiei hynrei kadei tang ban ioh ban iakhun pyrshah ia ka ejahar kaba la ujor da u Secretary Shnong ha ka 17 tarik u Nailar 2024 ha kaba u nongkhaii drok uba don jingiadei bad katei ka nongujor, ula shah kem ha ki nongialam shnong, Seng Longkmie bad Seng Samla shnong. Ka Dorbar Shnong ka sngew ba katei ka ejahar ka long ka bym don nongrim bad la ujor ia ka da ka jingthmu ym tang ban pynthohbria ia u Secretary Shnong hynrei ia ka Dorbar Shnong Nongsohphoh, UpperMawprem baroh kawei” la pynpaw ha ka kyrwoh.
Ka Dorbar Shnong kala maham tyngeh ba kino kino kiba don jingiadei bad katei ka riewshimet kaba la kynnoh khlem nongrim pyrshah ia u Secretary bad ia ka shnong abroh kawei kaba iengskhem ha ka nongrim ban ioh ia ka jingshisha bad ban pynthikna ba kitei ki jingkynnoh kiba khlem nongrim kidei ban shah shimkhia katkum ki kyndon aiñ.
