Shillong, Naitung 22 : Ka Meghalaya State Commission for Women (MSCW) ha ka sngi Saitjain kala pynpaw ia ka jingkyndit bad jingpynrem halor ka jingjia ba ishyrkhei kaba jia ha Manipur mynta la arbnai, ha kaba ki arngut ki kynthei riewlum kila shah pynlaw lynkhuit ki jain, pyniaid lyngkhuit hapdeng u paidbhur bad shah leh beijot ha ka lyngkha ba marjan.
Kane ka jingjia kala paw pyrthei hadien ka jingsaphriang jong ka video ha social media myn ha ka 19 tarik Naitung, kaba la pynbitar lep ia ki nongshongshnong ka Ri. Tang arphewsaw kynta ba mih pyrthei kane ka video, ki pulit kila kam ba kila kem ia 4 ngut ki briew ba donkti haduh mynta.
Ka MSCW ka ai khublei ia ka National Human Rights Commission bad ka Iingkashari Supreme Court halor ka jingshimkhia ban tuklar ia kane ka kam ba ipohdor .
Ka State Women Commission kala kyntu ruh ia ka Sorkar Pdeng bad Sorkar Jylla ban leh eiei mardor pyrshah ia ki briew ba donkti ha kane ka kam ba itriem kaba buh jingma ia ka burom ka ijot bad ka jingshngain jong baroh ki Kynthei bad ki Khunlung Khynnah jong ka Ri.
Ka Commission ka phah ruh ia ka jingsngewlem sha kito ki longiing kiba mad ia kane ka kam ba shyrkhei bad jingleh bym hok haba ong ‘Ai ba ka jingsuk kan wan phai noh ha Manipur”.
Pule ruh: Pyrshah jur ka NEHUSU ba rai kyrkieh u VC ban pyntreikam ia ka NEP ha NEHU
