Shillong, Jylliew 16: Ka Meghalaya Pradesh Youth Congress (MPYC) hynne ka sngi palei kala pynrem jur ia ka jingle donbor jong ka Sorkar Pdeng, kaba pyndonkam da ka Enforcement Directorate (ED) ban pynartatien ia ka jinglong khuid jong u Rahul Gandhi ha ka kam bamsap National Herald Case.
Haba iakren bad ki nongthoh khubor, u President ka MPYC samla Adrian Chyne Mylliem ula ong ba ka dei ka kam poh jong ka Sorkar Pdeng namar ba ka elekshon 2024 kala wan artad.
“Kane ka jingle ka dei tang ban pynthame ia ki paidbah na kaei kaba long ba man mynta” ula ong bad bynrap “Ngi la iohi ha kane ka Ri jong ngi ba bun ki ishu kila mih khamtam haba phai sha ka jingkiew dor ki mar ki mata, ka koit ka khiah ki nongshongshnong bad ki jingtei nalor kiwei kiwei”.
Haba kren halor ka jingkiew dor ki mar ki mata kaba la ktah jur ia ki briew ba kamai bylla sngi, une u nongialam ka MPYC ula ong “Ka dor jong ka LPG kala nang kiew bad baroh kiei kiei kila nang kiew dor katba ka Sorkar pat kam shym la leh eiei ban iarap ia ki paidbah”.
Ka MPYC kala kynnoh ba ka Sorkar kala shu shimkhia tang ia ka kam ban ia shna pisa bad nang riew spah katba ki paidbah ba duk ba suk ki nang im jynjar trah.
