Shillong, Iaiong 25: Ka Sports Cell jong ka Khasi Students’ Union (KSU) kala pynrem jur ia ka tnad Directorate of Sports & Youth Affairs jong ka jylla kaba la jied ia ki 7 ngut ki nongialehkai ki bym dei ki Khasi ne Garo ban mihkhmat ia ka jylla ha ka Basketball National School Games kaban long ha Haryana.
U Chairman Sports Cell jong ka KSU u samla Eric A. Nongkynrih ula ong, ba ka seng ka pynpaw ia ka jingkyndit hadien ba kala ioh jingtip ba ka sorkar jylla lyngba ka Directorate of Sports & Youth Affairs kala jied haduh 7 ngut ki khyllah jait napdeng ki 12 ngut ki nongialehkai Basketball ban mihkhmat ia ka jylla ha ka Basketball National School Games kaban long ha Haryana.
“Ha ka thup ki nongialehkai la shah jied tang 5 ngut ki trai jylla katba ki 7 ngut ki dei kiba nabar ki bym dei ki Khasi ne Garo. Kane ka jingleh shiliang khmat ka sorkar jylla ia ki khynnah lehkai Khasi ka wanrah ia ka jingkylli hato ka sorkar Meghalaya kadei ban kyntiew ia ki Khasi (Khynriam, Pnar, Bhoi, War, Maram & Lyngngam) bad Garo ne ban ai rynsan ban kyntiew ia kiwei pat ki Jaidbynriew bym dei trai shnong” la buh jingkylli u samla Eric A Nongkynrih lyngba ka kyrwoh khubor.
Ula ong, ka Sports Cell jong ka KSU ka pynrem jur ia kane ka jingleh beiñ bad jingbym kheiñ snep ka sorkar Meghalaya ia ki khynnah Khasi kiba don sap ban thrang ban ialehkai Basketball.
Ka KSU ka buh jingkylli hato ka Meghalaya ka rhah tang ban ioh ka nam jop da kaba wanrah da ki nongialehkai ba nabar ne ka thrang ban kyntiew ia ki khynnah ka jylla khnang ba kin kiew shuh shuh ha ki jingialehkai bapher bapher.
“Kane ka jingleh thurmur ka sorkar kan pynduh mynsiem bad pynduh lad ia bun ngut ki samla kiba angnud bad don sap ban ialehkai ia ka basketball bad ka KSU ka kyntu ia ki khynnah Khasi ban ym duh jingkyrmen wat haba la shah leh meinah ha ka sorkar jylla, namar ka seng kan iai wad ki lad ki lynti ban ai rynsan ia ki bad kumjuh ruh ban peit pyrman ba kin ym duh ia ka hok ka jongki na ka sorkar” la pynkut u nongialam ka KSU.
 kala pynrem jur ia ka tnad Directorate of Sports & Youth Affairs jong ka jylla kaba la jied ia ki 7 ngut ki nongialehkai ki bym dei ki Khasi ne Garo ban mihkhmat ia ka jylla ha ka Basketball National School Games kaban long ha Haryana.){kind=link}