Shillong, Jymmang 04: Ka Khasi Jaintia Church Leaders’ Forum (KJCLF) hynne ka sngi Palei, kala pynrem jur ia ki runar kiba la donkti ha kaban thombor ia ki jaidbynriew riewlum bad ia ki riewngeit Khristan bad ban pynjulor ia ki iingmane ha Manipur bad kala phah ruh iaka jingsngewlem sha ki bahaiing bahasem kiba la duh noh iala ki baieid bathoin na katei ka jingiakynad.
“Ka Forum ka ieng ryngkat bad kito kiba la shah ktah na katei ka jingiakynad bad kumjuh bad kito kiba la shah kyndang naka jaka sah ka jongki bad kiba la sah shipor ha ki jaka jong ki shipai bad ngi kyntu ia ki ba kin long kiba khlain, kiba peitngor bad kiba iatylli kawei” la pynpaw u Secretary ka KJCLF u Rev Dr Edwin H Kharkongor ha ka kyrwoh khubor.
U Rev Kharkongor ula ong, hadien ba 24 tylli ki iingmane kila shah pynjulor bad shah wiangding, la ioh ia ki khubor ba bun tylli ki iingmane kila shah ktah bad pynjulor na katei ka jingiakynad bad ka jingthombor bad jingshun ia ki riewngeit Khristan ha ka thain, khamtam mynta ha ka jylla Manipur. KIba bun na kitei kiba la mad iaka jingshem lanot kidei ki Khristan kiba dei ki riewlum ha katei ka jaka bad mynta ki im da ka jingsyier bad jingsheptieng ha ka por mynmiet bad la iohsngew ruh ba wat ki Meitei kiba la long Khristan ruh kila shah thombor bad wat ia ki iingmane jongki ruh la thombor naphang.
Ka Forum ka kyntu ia ka sorkar Manipur bad iaka sorkar pdeng ba kidei ba nshimkhia mardor ban pynkut noh shi syndon ia kane ka jingle be-aiñ bad ban sdang ia kiwei pat ki lad ki lynti ban pynbeit ia katei ka ishu kaba laktah ia ki nongshong shnong khlem da peit ne thew la kidei na kano kano ka niam ne jaidbynriew.
“Ngi kyntu ruh ia u Myntri Rangbah ka jylla ba yn shimkhia bad ka sorkar Manipur ha kaban iada iaka jingim bad iaki jingdon jingem jong ki riewlum bad ki Khristan ha ka jylla kynthup ia ki jaka mane Blei” la ong u Secretary ka KJCLF.
Ka KJCLF kala wer ruh ia baroh ki nongialam niam Khristan ha kathaiñ ban iasnohkti lang ha kaban buh jingduwai bad ban ia wanlang ha kaban shimkhia ia katei ka ishu kaba ktah ia ka bha ka miat jong ki paidbah bad ka imlang sahlang ha baroh ki liang.
