Shillong, K’lyngkot 4: Ka Khasi Jaintia Church Leaders Forum ( KJCLF) ka pynrem jur ia ki jingleh jubor kiba pynkthang ha ki riewngeit Khristan ryngkat bad ki jingpynjulor ia ki Iingmane bad ki tiar ki tar bakhuid bad bakyntang.
Kat kum ka kyrwoh, ka KJCLF ka ong “Wat haba ka snem thymmai 2023 ka dang sdang, kine ki kam jong ka jingshun ki la jia ha ki jaka ba don ha ka District Narayanpur jong ka Jylla Chhattisgarh. Kine ki jingjia ki la pynmynsaw ia bun ki briew ryngkat bad ia u SP ba dei peit hangto”.
“U Myntri Khynnah ka Sorkar Pdeng ba peit ia ka tnat kaba dei ia ki Rit-Paid, dang shen u la wan ha ki thain jong ngi ban iakynduh bad ki nongialam jong ki kynhun bad Balang Khristan bad kiwei de ki Rit Paid ha kiba u la pynpaw ba ka Seng BJP kaba synshar ha Sorkar Pdeng ka kwah ban weng noh ia ka jingsngewthuh jong ka ‘jingsheptieng’ na ki jingmut jingpyrkhat jong ki kynhun Rit Paid – ha kaba ki Khristan ki long kawei kaba kum kata. Pynban, ki jingjia kiba la jia ha ka Jylla Chhattisgarh ki pyni da kumwei pat”kala bynniaw.
Haba pynpaw ba ka KJCLF ka don ia ka jingkyrmen ba kito kiba shong ha ki shuki jong ka kyrdan bad ka bor kin jin da la kren pyrshah ia kito ki briew bad ki kynhun kiba lehbein lehkhoh pyrshah ia ki Khristan bad ki briew kiba pyndonkam ia la ka hok shimet ban jied hi ia la ka jingngeit bad ka niam, kala ong “Ka jingsngap jar kaba sawa jam jong u Myntri Rangbah Duh ka Ri pyrshah ia kito kiba lehbein ia ki Khristan bad kiwei de ki Rit Paid ka long kaba pynlyngngoh shibun”.
“Lane, hato ka dei pynban ka jingai jingbit kaba pynshlur ia kine ki kynhun ban leh bad iai leh ia kiba kum kine ki kam ba pyrshah ia kiwei pat ki nongshnong shnong tang namar ba ki dei ki Khristan ne ki dkhot jong kiwei pat ki kynhun Rit Paid ?” kala bynrap
Ka KJCLF ka ieng bad don lang ryngkat bad ki riewngeit Khristan bad kiwei ha ka Ri kiba iakynduh bad mad ia kine ki jingshahleh jubor, bad ka Forum ka duwai na ka bynta ba ka jingsuk bad jingialong shipara kan neh.
Ka KJCLF ka kyntu ia ki bor ha ki Jylla bad ka ka Sorkar Pdeng ba kin ai jingiada na ka bynta ki jingim briew bad ki jingdon jingem jong ki Rit Paid ha kylleng ka Ri. Ha kajuh ka por ruh da ka kti kaba khlain bad ba hok dei ban teh lakam ia kine kiba pynjia ia ki kam jingshun bad kam thombor.
