Shillong Nailur 03: Ka Hynñiewtrep National Liberation Council (HNLC) kala pynrem jur iaka jingleh jong ka sorkar jylla kaba la pynmih iaka jingpynbna paidbah ba khot hajir ia u Bah Saiñkupar Nongtraw, General Secretary ka HNLC hapoh ka iingkashari wat hapdeng ka jingiaid shakhmat jong ka jingiakren.
Ka HNLC kala dawa ruh ia ka Sorkar ban weng noh ia baroh ki jingpynngat kam bymman pyrshah ia baroh ki Nongialam ka HNLC bad ruh ban tyrwa ia ka jingmap ba marmar lem kumta ka HNLC ka lah ban weng noh ialade na ka jingiakren iasuk.
“Ka HNLC ka pynrem jur ia ka sienjam bala shim dang shen da ka Sorkar Jylla, khamtam ia ka jingpynbna paidbah ba khot hajir ia u Bah Sainkupar Nongtraw, General Secretary ka HNLC sha Iingkashari wat hapdeng ka jingiaid ka jingiakren iasuk” ong u Bah Sainkupar Nongtraw ha ka kyrwoh.
Ula ong ba kane kam dei ka sien kaba nyngkong ha kaba ki Nongialam ka HNLC kynthup u Chairman bad u Finance Secretary, kila shah khot hajir hapdeng ka jingiaid ka jingiakren iasuk.
“Kum kane ka jingleh ym tang ba ka pynartatien ia ngi ban shaniah ia ka Sorkar hynrei ka lah ruh ban ktah ia ka jingpyrshang ha kaban wanrah ia ka jingiapynbeit ka ban neh” ula ong.
Haba pynpaw ba ka HNLC kala kut jingmut halor ka jingiakren iasuk bad kala shimkhia ha ka jingiakren bad ka Sorkar Jylla, u Bah Sainkupar ula ong “Hynrei, ngi sngewkhia bha halor ka jingleh arsap bala pyni da ka Sorkar”.
“Ka Sorkar Jylla kala dawa ba ngan don lang ha ka jingialang da kaba buh por ia ka 30 tarik Nailur, katba ka MHA ha kawei ka liang, kala pynkylla sohpdung ia baroh ki Nongialam ba rangbah ka HNLC ba kin wan mih hi dalade” ula ong.
Ka HNLC kala ban jur ba baroh ki nongialam bad ki ehrang kin ym wan shakhmat tad haduh bala pynurlong ia ki jingdawa ka seng. Kala kyntu ruh ia ka Sorkar Jylla ban pynlong ia ka jingiakren bad ka kynhun bala ai jingbit da ka HNLC Central Executive Committee bala ialam da u Vice Chairman.
Ban pynthikna ia ka jingseisoh ka jingiakren iasuk, u Bah Sainkupar ula ong “Ngi dawa ban weng noh ia baroh ki jingpynngat kam bymman pyrshah ia ki Nongialam ka HNLC bad ban tyrwa ia ka jingmap noh ia ki. Khlem kine ki sienjam ba donkam, ki nongialam jong ngi kin nym lah ban iashimbynta ha ka jingiakren iasuk. Haba ngi la aibor ia u Vice Chairman bad ka kynhun ban mihkhmat ia ki sha ka jingiakren, ka jingbym shimkhia jong ka Sorkar kala sdang ban paw shai. Lada kane ka dang iai bteng, ngim ym don lynti pat da kumwei hynrei ban weng noh na ka jingiakren iasuk”.
Ha kawei ka liang, une u Nongialam ka HNLC ula ong ba kumba ka paw, ym shym la don ruh kawei ka peace accord ne jingiateh kular iasuk ha ka thain Shatei Lam Mihngia ka Ri kaban treikam, laitnoh tang ka Mizo Accord.
“Wat ka Instrument of Accession, kaba ka Sorkar jong phi kala leh jubor ia ka Bri jong ngi 76 snem mynshuwa, ym pat shym la pyntreikam kumba ka long. Nalor kata, wat ia ka Standstil Agreement bala iasoi hapdeng ka Sorkar India bad ka Federation of Khasi States la shu pynkhein. Halor kitei ki nongrim, hato phi lah ban khmih lynti ia ngi ba ngin ia bteng ban shaniah iaka sorkar?” ula ong.
“La da ka sorkar ka pyni iaka mon ban pynurlong ia ki jingdawa ki jong ngi, kaba long kumjuh bad ka rukom leh jong ka sorkar India ha ka jingphiah iaka Jammu bad Kashmir, kumta ngi lah ban pdiang ban ai ka jingshaniah ia ki bor sorkar. Ha ka 5 Tarik u Nailar 2019, ka Parliament jongka ri India kala pynbna ba la pynsangeh iaka jingpyntreikam iaka Article 370 ha Kashmir. Hadien 86 sngi, ha ka miet jongka 31 tarik u Risaw 2019 kala phiah noh iaka Kashmir” ong u Bah Sainkupar.
“Lada ka sorkar ka pyni ia katei ka juh ka nongrim ban phiah noh iaka jylla Meghalaya bad ban pynbna ba ka Hynńiewtrep kan dei noh la ka jong ka jylla ha ka por kaba la buh kumba la leh ia ka Kashmir, kumta ngin lah ban ai ka jingshaniah iaka sorkar. Ha kum katei ka khyllipmat, ngin ym donkam ia kano kano ka jingkyrshan pisa ne kaba phi ju kdew kum ka “Rehabilitation Packages” na ka bynta ka HNLC” ong u Nongialam ka HNLC.
“Ka jingiai bteng ban kdew uwei pa uwei u nongialam ka HNLC lyngba ka jingai notis ka long kaba iahap bha ban ai iaka jingkynthoh bad ngi kwah ban kren shai ba ngim tieng ia ki aiñ kiba thombor ne ia ka jingiap bad ngin iai bteng iaka jingialeh ka jongngi khlem da pyndem iaka nongrim.Ka jingteing kam ju don ha ka rukom treikam jong ka seng bad ka jingiakhun ka jong ngi ban rah atiar ka long kaba shong nongrim ha ka histori jong ka jingiakhih ka jong ngi” ong u Bah Sainkupar.
“Ban pynthikna ba ka jingiakren iasuk kan long kaba seisoh, ngi dawa ba ki kyndon kiba la pynngat ia ki nongialam ka HNLC dei ban pynkut noh bad ban map noh. Khlem ka jingshim ia katei ka sienjam, ki nongialam kiba hakhmat ki jong ngi kin ym iashimbynta shuh haka jingiaid jong ka jingiakren. Watla ngi la pynkup bor ha u Vice Chairman bad haka kynhun ban mihkhmat ia ngi haka jingiakren, ka jingpyni ia ka jingbym don iaka jingsngewkhia da ka sorkar kala nang iai paw bha bad lada kane ka rukom, ka dang iai bteng, ngin ym donshuh da kawei pat ka lad ban weng noh na baroh ka jingiakren” ula ong.
Shuh shuh ka jingkhang ne banned da ka Ministry of Home Affairs (MHA) ia ka Islamic Research Foundation (IRF) hapoh ka Unlawful Activities (Prevention) Act (UAPA) 1967 ka long kaei kaei kaba donkam ban kdew. Katei ka jingkhang kala paw ba ka long kaei kaei kumba la kam da u Zakir Naik uba la kynnoh ba ki heh ophisar jongka sorkar India kila iakynduh ia ban ailad da kaba suk ban iaid ban ieng bad ban weng ia baroh ki kes. Ka long kaba hap ban kdew ba u Zakir Naik ula shha khang pyrshah ha kiba bun tylli ki Ri. Ha kaba iadei bad ka jingkhang ka sorkar India iaka HNLC hapoh ka UAPA hapoh u pud u sam jongka MHA, kumta kane kala pynmih iaka jingkylli kaba kongsan, lada ka sorkar u Modi ka lah ban pyniar ha kaba iadei bad u Zakir Naik, balei ym shim la leh lang ia kane kumjuh ia ki nongialam bad ki dkhot jongka HNLC, kiba dang iashimbynta haka jingiakren iasuk bad ka sorkar hi?.
“Ka HNLC ka iengskhem ha ka nongrim ban pynurlong ban don ia ka jingsuk kaba shi rta bad ka jingpynbeit ia ka kam sain pyrthei. Ngi kyrmen skhem ba ka sorkar kan khmih bniah biang ia karukom leh ka jongka bad ban trei na ka bynta ban wanrah ia ka jingmynjur lang da baroh” la pynkut u Bah Sanikupar.
