Shillong, K’lyngkot 23 : U President ka Meghalaya Pradesh Congress Committee Bah Vincent H Pala ha ka sngi Ba-ar, ula ther tyngeh ia ka Sorkar Jylla halor ka jingkyntait ban ai jingbit ia ka Congress ba kan pynlong ia ka jingialang iasyllok hapoh USTM, Ri-Bhoi District hynnin ka sngi Nyngkong.
Kane ka jingiasyllok ka dei kaba la pynbeit ban pynlong hapdeng u President barim ka Congress Rahul Gandhi bad ki samla pule ka USTM.
U Rahul Gandhi uba la wan ha Ri-Bhoi ban pynlong ia ka ‘Bharat Jodo Nyay Yatra’ u dei ban leit pynlong ia ka jingialang syllok bad ki samla pule ka USTM hynrei ka Sorkar ka khlem ai jingbit satia.
U Bah Pala ula ong ba kane hi ka pyni ba ka Sorkar MDA ka trei kat kum ka jingpyniaid jong ka BJP ha Delhi bad katto katne ki Nongialam na Assam.
Haba kren halor ka elekshon Lok Sabha, u Bah Pala u pyntip ba katto katne ki kyrtong kiba kwah iakhun ia ka elekshon na ka ticket ka party, kila dep phah ia ki aplikeshon. Ia ki aplikeshon jong ki yn sa shong bishar bad mynjur da ka AICC.
Ha kajuh ka por, ka North East Congress Co-Ordination Committee hynne ka sngi Ba-ar kala shong da ka jingïalang ha Queens Hotel Jorabat ban pynlong ka iamir jingmut ia ki mat ki ban pynrung haka manifesto jong ka seng na ka bynta ka elekshon Lok Sabha.
U Ma Vincent H Pala ula pyntip ba ka seng Congress na Meghalaya kala ai jingmut ban pynrung ruh iaka jingeh ki nongrep haka manifesto jong ka seng Congress.
Ula ong ruh ba ha katei ka jingialang la ioh ruh ban iakren iaka jinglong jingman haka jylla Manipur kaba ki paidbah haduh mynta ki dang don hapdeng ka jingsyier bad la rai ruh ban leit da ka kynhun sha Manipur ha kaba yn sa jied da ki nongmihkhmat naki jylla ka thaiñ Shatei Lam Mihngi.
