Imphal, K’Lyngkot 05 :Ka All Manipur Working Journalists Union (AMWJU) bad ka Editors’ Guild (EGM) ki pynrem jur halor ka jingshah set along jong u Hemantakumar Ningomba uba dei u Editor jong ka kotkhubor Sanaleibak hadien ba ki pulit ka Irilbung police station kila wan kem na ka iingsah ka jong u ha Imphal East District.
Lah ban kdew ba kala don ka jingiamir jingmut kaba bniah hapdeng ka All Manipur Working Journalists Union bad ka Editors’ Guild, Manipur kaba la long hynnin ka sngi Balang hapoh Manipur Press Club, Imphal.
“U Hemantakumar u dei u editor uba la ioh pdiang ia ka burom bad um dei satia u nong phetrieh, bad ka rukom ha kaba la leit kem ia u namar ka jingkren ka jong u ha ka prokram iamir jingmut lyngba ka tnat telebishon channel kala ktah jur ia ka burom ka jong u hapoh ka imlang ka sdahlang,” pynpaw ka AMWJU bad ka EGM.
Nalor kata ka seng kala kynnoh ruh ba ki ophisar ba dei khmih ki la dei ban shu khot ia u na ka bynta ban iakren ha ki kynta long trei namar kam shym la don satia kano kano ka jingrejistar case pyrshah ia u ha kaba la pyllait noh ia u hadien katto katne kynta.
Ka jingialang jong kitei ki arkynhun kila shim ruh ia ka rai ban rah sha ka sorkar jylla khnang ban pynthikna ba kiba kum kine ki jingleh ba beain kin ym wan jia shuh hadien habud.
“Lada kum kine ki jingjia kin dang wan jia biang, ka kynhun ki nongpathai khubor kin ym shong sngap jar hynrei kin shim ia baroh ki sienjam ban iada ia ki hok jong ki nongpathai khubor ka jylla, kata kynthup ban leit sha ka iingbishar,” ong kitei ki arkynhun.
Ha u snem 2021, ki bor pulit ka Manipur kila pynngat ruh ia uwei u nongpathai khubor bad uwei pat u nongtreikam bhalang hapoh ki kynhun jong ka National Security Act (NSA) namar ki jingpynpaw kiba pynmih kynrum kynram lyngba ki social media, kata halor ka jingiap jong u president ka BJP Manipur u S Tikendra Singh uba la khlad noh na ka jingpang Covid-19.
Hadien ka Facebook post ka jong u, la rejistar da ka FIR pyrshah ia u da u vice president ka BJP Manipur u Usham Deban lem bad u general secretary ka party u P Premananda Meetei.
Hadien kane ki pulit ka Manipur kila kem noh ia une u nongpathai khubor ia uba la tip kyrteng kum u Kishorechandra Wangkhem (41snem rta) kumjuh ruh ia uwei pat u nongtrei kam bhalang ia uba la tip kyrteng kum u Leichombam (40 snem rta) na ki iingsah jong ki.
Katba ka jingsngewlem halor ka jingkhlad noh jong utei u nongialam ka BJP ka dang iaid shakhmat, kitei ki arngut kila pynpaw lyngba ki Facebook post da kaba ong ba ka umjung masi bad ka eit masi kim lah satia ban pynjem ia ka jingpang COVID-19.
