Shillong, Iaiong 10 : Ka National People’s Party (NPP) ha ka sngi Balang, kala pynrem jur ia ki runar kiba shoh dusmon ia ki lai ngut ki nongbylla bar jylla ha Mawlai Mawroh, kaba lam ruh sha ka jingiap jong uwei napdeng jong ki.
“Ngi kyrpad ia ki Pulit ba kin leh eiei bad pynthikna ba ki briew ba donkti kin shah kem kham kloi kat kaba lah” ong u Nongaiktien ka NPP Bah Himalaya Shangpliang ha ka kyrwoh.
Uwei u nongbylla bar jylla ba kyrteng u Arjun Rai ula iap bad uwei pat ba kyrteng u Raja Ram ula mynsaw na ki bynta jong ka khlieh, na ka jingshah bom da u lyngka ha ka kynhun ki runar kiba don kumba 5-6 ngut eiei.
Kane ka jingjia kala jia hynne ka step sngi Balang por 11 baje eiei. La ong ba kine ki briew kila leit pan Labour Licence na kine ki nongbylla bad namar ba kim don, kila shu shoh shu bom ia ki haduh da jem jai.
Ki Pulit kila register case halor kane ka jingjia bad ka jingtohkit mynta kala iaid shakhmat.
Ha kajuh ka por, u Myntri Sorkar Bah A.L.Hek uba dei ruh u MLA ka Pynthorumkhrah, ula kular ban sa rah iakren ia kane ka kam bad u Myntri Rangbah ka Jylla Conrad K Sangma lem bad ka Sorkar Pdeng ban pynthikna ba ki briew ba donkti, kin ioh ia ka jingpynsajia ba tyngeh.
Haba pynrem ia kane ka kam pyntriem, u Bah Hek ula ong ba kum kine ki kam riewkhlaw ym dei satia ban ailad bad ki briew ba donkti kim dei ban ioh iaid laitlan.
