Thungkam shuwa ia ki Garo ban pyndap ia ki jingthung duna ha ki 50 snem
Shillong, Jymmang 29 : Ka Garo Students Union (GSU), hynne ka sngi Nyngkong, kala pynrem jur ia ka jingkynnoh leh Politics ka Voice of the People Party (VPP) halor ka jingdawa ban bishar thymmai noh ia ka State Job Reservation Policy haba dawa ia ka Sorkar Jylla ba ka jingbishar thymmai ia ka Policy kam dei ban ktah ia ka jingsam bhah ba 40:40 % ia ki Khasi Jaintia bad ki Garo.
Ka Garo Students Union (GSU) lyngba u President Zikku Balgra N Marak, kala kynnoh ba ka VPP kala leh politics ia kane ka kam da kaba buhrieh lut ia baroh ki jingshisha bad ai ia ki jingtip kiba shu thaw hi sha ki paidbah.
“Ha ka jingpyrshang ban pyntyllun shakhmat ia ki buit politics jong ka, ka VPP ka kloi ban ialam ia ka Meghalaya sha ka jingjia kumba jia ha Manipur lane kaba kham palat” ong ka GSU halor ka jingiakhih ka VPP ban pynbor ia ka Sorkar Jylla ba kan shong bishar thymmai ia ka Job Reservation Policy ka Jylla.
Ka GSU kala ong ba wat hapdeng shibun ki jingkynnoh bad jingkam jong ka VPP, kane ka party kam shym la lah ban ai jingkhein bala ioh na ki Tnad Sorkar ban kyrshan ia ki jingkam jong ka- ba ki Khasi kila duhnong, shah pynduh bad ba kin sa duhnong.
“Halor kano ka jingkhein jingdiah ba ka VPP kala pynmih ia kane ka jingkam. Ka jinglong jingman ka Ri-lum Garo bad wat ka Ri-lum Jaintia, kala paw, ka bym lah kyntait bad ka dei ka kot kaba baroh ki lah ban pule” ong ka GSU.
Halor ka jingkam ba ki samla Khasi ki iaid khlem kam khlem jam, u Marak ula ong “Kane ka long kaba shisha wat ia ki samla Garo bad lada khein bha, phin shem ba kham bun ki Garo hynrei ka VPP ka jied ban buhrieh ia kane ka jingtip ba donkam bha”.
“Ka Ri-lum Khasi kala iohnong bha da ka jinglong ka Khun ba ieid eh ka Meghalaya naduh ba ioh Jylla la ka jong…ta ka daw ka jingkylli ba ki shah pynduh, ka dei ka bym don nongrim” ula bynrap.
Namar kane ka jingiakhih ka VPP, ka GSU kala buh ia ka jingdawa ba ka Sorkar Jylla ka dei ban kren shai/pynbna ryngkat ki jingkhein halor ka jingdon ki kam ba khlem pat pyndap jong ka bhah ki paid Garo ha ka jingthungkam ha kine ki 50 snem bala leit noh.
Ka GSU kala dawa ba ka Sorkar Jylla ka dei ban thungkam pyndap shuwa ia ka bhah baroh jong ki paid Garo da kaba pynlong ia ka jingthungkam ba kyrpang.
Nalor kane, ka GSU kala dawa ba ka Sorkar Jylla ka dei ban pynsangeh shuwa ia baroh ki jingthungkam na kiwei kiwei ki Jaidbynriew tad haduh ban da dep thung pyndap shuwa ia ka bhah ka khlem pat pyndap jong ki paid Garo.
Ka GSU kala ong ba katba ka Sorkar kam pat pyndap shuwa ia ka bhah thungkam jong ki Garo naduh ki snem bala leit noh, kam dei satia ban mih ka jingkylli ban iakren halor ka Reservation Policy.
“Ngi ki Achik ngi don ka hok ban ioh ia ka bhah bad lada donkam, ngin leit tynjuh sha ka Iingkashari ban ioh ia ka jingbishar kaba hok” kala ong.
Ha kajuh ka por, ka GSU ka ong ba lada ka Sorkar ka kwah ban shong bishar thymmai ia ka Job Reservation Policy, ka dei ban thung da u Special Retired/ Sitting Judge jong ka Iingkashari Supreme Court khnang ba kan iaid kat kum ki kyndon ba donkam bala kdew ha ka Riti Synshar ka Ri kata halor ka jingsahdien bad ka jingduna ki Nongmihkhmat.
“Lada ka Sorkar ka kwah ban shong bishar thymmai, ka Job Reservation Policy kam dei ban ktah ia ka bhah bala ai sha ki Khasi Jaintia bad Garo kaba long 40:40 %” ong ka GSU.
