Shillong Naitung 26: Ka Womens’ Wing jong ka seng saiñ pyrthei National People Party (NPP) hynne ka sngi Balang kala pynrem jur ia ki riewshimkabu kiba la pyrshang ban pynmynsaw ia u Myntri Rangbah ka jylla u Conrad K Sangma ha sor Tura myn ha ka Lah Sngi U Blei.
Ka President jong ka NPP Women’s Wing Kong P Nongpluh kala ong ba ka seng ka pynrem jur ia kitei ki riewshimkabu kiba la pyrshang ban pynmynsaw ia u Myntri Rangbah ka jylla bad katei ka jingthombor ka jongki kadei kaba la don jingthmu lypa ne pynkhreh lypa bad kadei ruh ka buit politik jongno jongno ban ther maw ha kaban pynmynsaw ia u Myntri Rangbah ka jylla.
Kala ong ba katei ka jingthombor ka long ka bym sngewiahap satia namar ba u Myntri Rangbah ula shimkhia dalade ban iakynduh bad shong jingialang bad ki kynhun sengbhalang kiba don ia ki mat jingdawa bad ban sngap bad shah shkor ia ka jingdawa ka jong ki.
Ki nongialam kila ong ruh ba ka kam thombor bad ban pynmynsaw iano iano kam dei satia ka lynti ban lah ban weng ia kano kano ka jingeh.
Kane ka nongialam kala kyntu ia ki paidbah bad ia ki kynhun kim dei ban pynmih ia kum kitei ki jingkulmar hynrei ban shim da ki lynti kiba jai jai ban weng ia ki jingeh da kaba iakren da ka jingiasngewthuh jingmut.
