Guwahati, Naialar 27: Ka PRIME startup hub ka Meghalaya ka lah ban don noh ia ka jingiadei bad ka Ri Austria ha kaba iadei bad ka jingthmu ban pyniar iaka jingseng kam lajong.
Da ka jingthmu ban wanrah iaka jingiadei bad ka jingiatreilang kaba iajan hapdeng ki nongsengkam lajong jong ki Ri bapher bapher, ka PRIME Startup Hub Meghalaya kala pynlong ia ka jingialang ha ka 23 tarik u Nailar ha PRIME Hub, Shillong.
Ha katei ka jingïalang la wan ïashim bynta da ki heh na ka Embassy ka Austria ryngkat bad ki nongmihkhmat jongka PRIME Startup Hub Meghalaya, ki nongmihkhmat na ki karkhana bad ki nongsengkam lajong kiba na ka thaiñ. Kane ka sienjam ka dei kaba la kyrshan da ka Sorkar Meghalaya, ka don ia ka jingthmu ban pyni ïa ka jingdon jingem jong ka jylla kaba dang kiew ha kaban sengkam sengjam bad ban wad ïa ki lad ki lynti ban ïatreilang bad ka ri Austria.
Ki riewpawkhmat kiba la ïashimbynta ha ka jingialang ki kynthup ïa u Ajay Singh, u Head of Technology and Innovation jong ka Austrian Embassy’s Commercial Section bad u Arun Verma uba long u Advisor ka Organizational Matters ka Vantage Info. Kiwei pat ki kynthup ia u Aditya Sen u Program Head ka PRIME Startup Hub, ka Jacqueline Swer ka Senior Manager ka PRIME Startup Hub, Jefferson Rani u Manager of Partnerships bad kiwei kiwei.
Ha katei ka jingialang la iakren shaphang ki jinglah ban don iaka jingiatreilang jong ki karkhana ba kongsan kum ka Adventure Tourism, Waste Management, Healthcare, Creative Services bad Bio-Char Production. Baroh arliang mamla kila ailang iaka jingkular ban thaw ia ka ‘Plan’ ban pyniar ia ka jingkieng jong ka jingiatreilang hapdeng ka Austria bad ka Sorkar Meghalaya, da kaba buh iaka thong ba kongsan ban kyntiew ia ka jingroi jong ka jingsengkam sengjam bad ka jingpynmih ia kiei kiei kiba thymmai ha ka thain.
Hadien ka jingïalang, katei ka kynhun kala leit jngoh ïa ki Startup kiba don ha Ri Bhoi kiba kynthup ïa ka Rynsan Creation Pvt. Ltd Food Processing Unit, Whitewater Village ha Umtham, Mei-Ram-Ew ka jaka bam tynrai bad ka Ri & Last Eri Silk Weaving & Dyeing Unit.
Nalor kane, kila iashong jingialang ruh bad u Dr. Vijay Kumar uba long u Commissioner & Secretary ka sorkar Meghalaya bad u CEO jongka PRIME Startup Hub Meghalaya.
Katei ka jingialang kala pynleit jingmut na ka bynta ban wad ia ki lad ki lynti ban don ia ka jingiatreilang ban pynkhlain ia ki jinglong jingman ha ka jingsengkam lajong ha ka jylla, khamtam ha kaban kyntiew ia ka jingiadei jongki iew ki hat bad ki kor teknoloji.
Kane ka jingpyrshang ban don iatreilang ka pyni iaka jingkongsan ban don ia ka jingiatreilang bad ki ri ban pynkup bor ia ki nongseng kam seng jam ka jylla, kaban iarap kylla ha kaban noh synniang sha ka roi ka par bad ka ioh ka kot jong ka imlang sahlang ka jylla Meghalaya lyngba ka jingsam lang ia ka jingnang jingstad bad ka jingpynmih ia kiei kiei kiba thymmai.
